2022 ވަނަ އަހަރުގެ ޖެނުއަރީ މަހުގައި މާފަންނުގެ ގެއެއްގެ ތެރޭގައި މަރުވެފައި އޮއްވާ ފެނުނު އުމުރުން 44 އަހަރުގެ ހއ. ހޯރަފުށި، ޑީންސްވިލާ، ހާޝިމް މުހައްމަދުގެ މަރުގެ މައްސަލައިގައި ބަލަންޖެހޭ ކަންކަން ބަލަމުން އަންނަ ކަމަށް ފުލުހުން ބުނެފިއެވެ.
ފުލުހން ބުނީ، ހާޝިމް މުހައްމަދުގެ މަރުގެ މައްސަލައިގެ ތަހުގީގަށް ހާޝިމް މުހައްމަދުގެ ފޯނު އޭރު ގެނެސްފައިވާ ކަމަށާއި ފުލުހުންގެ ތަހުގީގަށް ބޭނުންވާ ތަހުލީލުތަކަށްފަހު ފޯނު ވާނީ އާއިލާއާ ހަވާލުކޮށްފައި ކަމަށެވެ. އަދި އިތުރު އެއްވެސް އިލެކްޓްރޯނިކް އާލާތެއް މި މައްސަލައިގެ ތަހުގީގަށް ގެނެސްފައި ނުވާ ކަމަށް ފުލުހުން ބުނެއެވެ.
މި މައްސަލައިގެ ތަހުގީގު ނިންމާފައި ވަނިކޮށް އާއިލާއިން ކަންބޮޑުވުން ތަކެއް ހިއްސާކޮށްފައި ވާތީ އެ ކަންބޮޑުވުންތަކާ ގުޅިގެން ބަލަންޖެހޭ ކަންކަން ބެލުމުގެ މަސައްކަތް ދަނީ ކުރަމުން ކަމަށް ފުލުހުން ބުނެއެވެ.
ހާޝިމްގެ މަރުގެ މައްސަލަ އަނެއްކާ ބަލަން ފަށާފައިވާ އިރު، ދާދި ފަހުން ވަނީ ހާޝިމްގެ ވިޔަފާރިތަކަށް އަތްގަދަކޮށް އޭނާގެ ދަރިފުޅުގެ ސޮއި ފޯޖުކޮށް ލިޔެކިޔުން ތައްޔާރުކުރުމަށް ފަހު އެ ވިޔަފާރިތަށް އިސްލާމިކް މިނިސްޓްރީގެ ނައިބު އަދި ސަލްމާން މިސްކިތުގެ އިމާމް އަބްދުލް ޖަލީލު އިސްމާއީލްގެ ނަމަށް ބަދަލުކުރިކަމަށް ތުހުމަތުކުރާ މައްސަލައެއް ފުލުހުން ތަހުގީގު ކުރަން ފަށާފައެވެ.
މި މައްސަލަ މި މަހުގެ 19 ވަނަ ދުވަހު ފުލުހުންނަށް ހުށަހަޅާފައިވާ އިރު، ފުލުހުން ބުނެފައި ވަނީ، ސޮއި ފޯޖު ކުރި މައްސަލަ ބަލަމުންދާ ކަމަށާއި، މުދަލާ ގޯތި ގެދޮރުގެ މައްސަލަ ސިވިލް ކޯޓު މެދުވެރިކޮށް ކުރިއަށް ގެންދިއުމަށް ދެ ފަރާތަށް ވެސް ފުލުހުން އިރުޝާދުދީފައި ވާނެ ކަމަށެވެ.
