ގައިދީން ޖަލުގައި އުނގެނުމަށް ނުވަތަ މަސައްކަތުގައި ހޭދަކުރާ ކޮންމެ ދުވަހަކަށް ޖަލު ހުކުމުން ދުވަހެއް އުނިކުރުމަކީ ސަރުކާރުގެ ސިޔާސަތެއް ކަމަށް ހޯމް މިނިސްޓަރު އަލީ އިހްސާން ވިދާޅުވެއްޖެއެވެ.
އިހްސާން މިފަދައިން ވިދާޅުވީ "ދިވެހި ސަގާފީ ގޯތި" ހުޅުވުމަށް މިއަދު ހެނދުނު ކ.މާފުށީގައި ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
އިހްސާން ވިދާޅުވީ ގައިދީންގެ ތެރެއިން ރިހެބްލިޓޭޝަންގެ މަސައްކަތުގައި ބައިވެރިވާ ކޮންމެ ގައިދީއަކު މަސައްކަތް އުނގެނުމަށް ނުވަތަ މަސައްކަތް ކުރުމަށް ޖަލުގައި ހޭދަކުރާ ކޮންމެ ދުވަހަކީ އޭނާގެ ޖަލު ހުކުމުން 1 ދުވަސް އިތުރަށް ކެނޑިގެންދާނެ ދުވަހެއްގެ ގޮތުގައި ހަމަޖެއްސުމަކީ ރައީސް ޑރ. މުހައްމަދު މުއިއްޒުގެ ސިޔާސަތެއް ކަމަށެވެ.
އެގޮތުން ގާނޫނުތަކާއި ގަވާއިދުތަކަށް ގެންނަން ޖެހޭ ބަދަލުތައް ގެނެސް މިކަން ހަރުދަނާ ގޮތެއްގައި ކުރިއަށް ގެންދެވޭނެ އުސޫލުތަކެއް ކަރެކްޝަނަލް ސާވިސްއިން ވަރަށް އަވަހަށް ކަނޑައަޅާނެ ކަމަށާއި އުސޫލުތައް ކަނޑައެޅުމަށްފަހު ހުރިހާ ގައިދީންނަށް ވެސް އިއުލާނު ކުރާނެ ކަމަށް އިހްސާން ވިދާޅުވިއެވެ.
އިހްސާން ވިދާޅުވީ ރައީސްގެ އިރުޝާދަކީ ގައިދީންނަށް ރަނގަޅު ފަންނުވެރި މަސައްކަތެއް ދަސްކޮށްގެން އާމްދަނީ ލިބޭނެ މަގު ހޯދާ، މުޖުތަމައަށް އަނބުރާ އަވަހަށް ނުކުމެވޭނެ ގޮތް ހަމަޖެއްސުން ކަމަށެވެ. އަދި ޖަލަށް މީހާ ވަނުމާއެކު އިސްލާހީ މަސައްކަތްތައް ފެށި، ދަސްކުރަންޖެހޭ ކަންކަން ދަސްކޮށް މުޖުތަމައަށް ބޭނުންތެރި ދިވެއްސެއްގެ ގޮތުގައި ގޮސް ރާއްޖެ ތަރައްގީ ކުރުމުގެ މަސައްކަތުގައި އުޅުމަކީ ރައީސްގެ އެދިލެއްވުމެއްކަން މިނިސްޓަރު ފާހަގަ ކުރެއްވިއެވެ.
ގައިދީން ތައްޔާރުކުރާ ސަގާފީ އަދި އެހެނިހެން ތަކެތި ރާއްޖެއަށް ޒިޔާރާތް ކުރާ ފަރާތްތަކަށް ވިއްކޭނެ ގޮތް ހަމަޖައްސަވައިދެއްވާނެ ކަމަށް އިހްސާން ވިދާޅުވިއެވެ. އެގޮތުން ވެލާނާ އިންޓަނޭޝަނަލް އެއާޕޯޓުން އެކަމަށް ޖާގައެއް ހޯދުމުގެ މަސައްކަތް ކުރަމުންދާ ކަމަށާއި، އެ ވިއްކާ ލިބޭ ފައިދާގެ ތެރެއިން ބައެއް ގައިދީނަށް ލިބޭނެ ގޮތް ހަމަޖައްސަވާނެ ކަމަށް ވެސް އިހްސާން ވަނީ ވިދާޅުވެފައެވެ.
