ރާއްޖޭގައި ފުޅާ ދާއިރާއެއްގައި ހަށިވިއްކުމުގެ ވިޔަފާރި ކުރަމުންދިއަ ބިދޭސީންތަކެއް ޑީޕޯޓުކޮށްލައިފިއެވެ.
އިމިގްރޭޝަނުން ބުނީ ފުލުހުންގެ އިންޓެލިޖެންސަށް ލިބުނު މައުލޫމާތަކާއެކު އިމިގްރޭޝަނާއި ފުލުހުން ގުޅިގެން އޮގަސްޓު 11 ވަނަ ދުވަހު ވަނީ ހާއްސަ އިންސްޕެކްޝަނެއް ހިންގާފައި ކަމަށެވެ. އަދި މި އިންސްޕެކްޝަނުގައި ބިދޭސީ 3 އަންހެނުންނާއި އެމީހުންގެ އެޖެންޓުގެ ގޮތުގައި މަސައްކަތް ކުރަމުންދިއަ ބިދޭސީ ފިރިހެނަކު ރާއްޖެ އަނބުރާ ނާދެވޭ ގޮތަށް ޑީޕޯޓުކޮށްފައިވާ ކަމަށް އިމިގްރޭޝަނުން ވަނީ ބުނެފައެވެ.
އިމިގްރޭޝަނުން ވަނީ ޑީޕޯޓު ކުރެވުނު 4 ބިދޭސީންގެ ވަނަވަރުވެސް ހާމަކޮށްފައެވެ.
ހޯމްލޭންޑް ސެކިއުރިޓީ މިނިސްޓަރު އަލީ އިހުސާނު ނޫސްވެރިންގެ ބައްދަލުވުމެއްގައި ވަނީ ސެލޫނާއި ސްޕާގެ ނަމުގައި ހަށިވިއްކާ 111 ތަނެއް މާލެ ސަރަހައްދުގައި ހުރި ކަމަށް ވިދާޅުވެފައެވެ.
ސެލޫންތަކުގެ ނަމުގައި މާލެ ސަރަހައްދުގައި ފުޅާ ދާއިރާއެއްގައި ހަށިވިއްކުމުގެ މަސައްކަތް ކުރަމުންދާކަން ފާހަގަކޮށް އިހުސާން ވިދާޅުވީ، އެފަދަ ކަންކަމުގައި ރާއްޖެއިން ބޭރު ގައުމުތަކުން ޓޫރިސްޓް ވިސާގައި މީހުން އެތެރެކޮށް، ބޭނުން ކުރަމުންދާކަން ފާހަގަވެފައިވާ ކަމަށެވެ.
އަދި އެ ތަންތަނާ މެދު ގާނޫނީ ފިޔަވަޅު އެޅުމުގެ މަސައްކަތް މިނިސްޓްރީން ކުރަމުންދާ ކަމަށް އޭނާ ވިދާޅުވިއެވެ. އެގޮތުން އެފަދަ މީހުން ދެނެގަނެ، ވަގުތުން ޑީޕޯޓު ކުރުމުގެ މަސައްކަތް އެ މިނިސްޓްރީން ކުރަމުންދާ ކަމަށްވެސް އިހުސާން ވިދާޅުވިއެވެ.
މާލޭގައި މަސާޖު ޕާލާތަކުގައި ހަށިވިއްކާ މައްސަލަ މީގެ ކުރިން ފެންމަތިވެ އެ ތަންތަނުން ފުލުހުންގެ ބެލުމުގެ ދަށަށް މީހުންވެސް ވަނީ ގެންގޮސްފައެވެ. މިފަދަ އަމަލުތައް ހިންގުމުގައި ދިވެހިންނާއި ބިދޭސީންވެސް އުޅޭ ކަން ފާހަގަކޮށްލެވެއެވެ.
