ގަވާއިދާ ހިލާފަށް އުޅެމުންދިޔަ 6 ބިދޭސީއަކު އިމިގްރޭޝަނުން ހައްޔަރުކޮށްފިއެވެ.
އިމިގްރޭޝަނުން ބުނީ ގަވާއިދާ ހިލާފަށް ރާއްޖޭގައި ވިޔަފާރިކޮށް ދިރިއުޅެމުންދާ ބިދޭސީންނާއި ގުޅޭގޮތުން ޓާސްކު ފޯސް އަށް ލިބުނު މައުލޫމާތާއި ގުޅިގެން އޮގަސްޓު 21 ވަނަ ދުވަހު، މާލޭގެ ތިން ތަނަކާއި "އިމިގްރޭޝަން ވޮޗް" އަށް ލިބުނު ރިޕޯޓަކާއި ގުޅިގެން ހުޅުމާލޭގެ އެއް ތަނެއް ބަލާ ފާސްކޮށްފައިވާ ކަމަށެވެ.
އަދި މި ރެއިޑުތަކުން އަންހެނަކު ހިމެނޭހެން ޖުމްލަ 6 މީހުން ހައްޔަރުކޮށްފައިވާ ކަމަށް އިމިގްރޭޝަނުން ބުނެއެވެ.
ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް މި ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން ބިދޭސީން ހިންގާ ކުދި ރީޓެއިލް ފިހާރަ އަދި ޓޭކްއަވޭ ކޮފީ ޝޮޕްތަކުންނާއި މާލޭގައި ހިންގާ ހަށި ވިއްކާ ތަންތަނުން ވެސް ބިދޭސީން ދަނީ ހައްޔަރުކޮށް އަނބުރާ ގައުމަށް ފޮނުވާލަމުންނެވެ.
އަދި ސާފުތާހިރުކަން ކުޑަ ތަންތަނުގައި ކާބޯތަކެތި އުފައްދާ މީހުންނާއި އެފަދަ ތަކެތި ވިއްކަމުންދާ މީހުން ދެނެގަނެ އެމީހުންނަށްވެސް އިމިގްރޭޝަނުން ދަނީ ފިޔަވަޅު އަޅަމުންނެވެ.
ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރުމަށް ރައްޔިތުން ދޭ އެއްބާރުލުން ފާހަގަކޮށް އިމިގްރޭޝަނުން ވަނީ ޝުކުރު އަދާކޮށްފައެވެ. އަދިވެސް މިފަދަ މައްސަލަތައް "އިމިގްރޭޝަން ވޮޗް" މެދުވެރިކޮށް ރިޕޯޓު ކުރަމުން ދިއުމަށް ވެސް އިމިގްރޭޝަނުން ވަނީ އެދިފައެވެ.
