ތ. ދިޔަމިގިލީ ކައުންސިލް އިދާރާގެ ތިޖޫރީން 6 ލައްކައަށް ވުރެ ގިނަ ރުފިޔާ ގެއްލިފައިވާ ކަމަށް އެ ކައުންސިލްގެ އޮޑިޓް ރިޕޯޓުން ދައްކައިފިއެވެ.
ދިޔަމިގިލީ ކައުންސިލް އިދާރާގެ 2022 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުގައި ބުނެފައިވާ ގޮތުގައި އެ ކައުންސިލްގެ އިދާރާގެ ތިޖޫރީގައި ހުންނަން ޖެހޭ ފައިސާގެ ތެރެއިން ގެއްލިފައިވަނީ 605،438 ރުފިޔާއެވެ. މި އޮޑިޓް ރިޕޯޓުގައި ވަނީ މިދިޔަ އަހަރު އޮކްޓޯބަރު 10 ނިޔަލަށް ކައުންސިލްގެ ތިޖޫރީގައި ހުންނަން ޖެހޭ ފައިސާ ނެތްކަމަށެވެ.
އޮޑިޓް ރިޕޯޓުގައި ފާހަގަކޮށްފައިވާ ކަންތައްތައް:
- 2020 ވަނަ އަހަރު ފެށުނުއިރު ހުރި 468،004ރ. އާއި ކައުންސިލަށް ނަގުދު ފައިސާގެ ގޮތުގައި ބަލައިގެންފައިވާ 397،052ރ. އާއި ބޭންކް އެކައުންޓުތަކުން ނަގާފައިވާ 1.9 މިލިއަން ރުފިޔާގެ ނަގުދު ފައިސާއާއެކު ޖުމްލަ 2.8 މިލިއަން ރުފިޔާ ކައުންސިލުގެ އިދާރާގެ ތިޖޫރީގައި ބަހައްޓައިގެން ރޯލްކޮށްފައިވެއެވެ. އޭގެ ތެރެއިން 455،174ރ. ބޭންކް އެކައުންޓަށް އަނބުރާ ޖަމާކޮށްފައިވެއެވެ. އަދި ނަގުދު ފައިސާ އިން 1.7 މިލިއަން ރުފިޔާ ހަރަދުކޮށްފައިވެއެވެ.
- ކައުންސިލުން ހަރަދުކުރި ކަމަށް ބެލެވޭ 1.7 މިލިއަން ރުފިޔާގެ ތެރެއިން ވެސް ކައުންސިލްގެ ބޭނުމަށް ހަރަދުކުރިކަން ކަށަވަރުކުރެވިފައި ވަނީ 1.4 މިލިއަން ރުފިޔާއެވެ. އަދި އެ ފައިސާ ކައުންސިލުގެ ހަރަދުކުރި ކަން ޔަގީންކުރެވެނީ ޕޭމަންޓް ވައުޗަރާ އިތުރު ލިޔެކިޔުންތަކުންކަމަށް ރިޕޯޓުގައި ބުނެފައިވެއެވެ.
- ބާކީ ހުރި ތިން ލައްކައެއްހާ ރުފިޔާގެ ހަރަދާ ގުޅޭ ބައެއް މައުލޫމާތު ކައުންސިލް އިދާރާ އިން ވަކިން ބަލަހައްޓަމުންދިޔަ ރަޖިސްޓަރީއެއްގައި ހިމަނާފައި ވިޔަސް، އެ ހަރަދުތަކާ ގުޅޭ އެހެން ލިޔެކިޔުމެއް ނެތްކަމަށް ރިޕޯޓްގައި ވަނީ ފާހަގަކޮށްފައެވެ.
- ކައުންސިލްގެ އިދާރާއަށް ބަލައިގަންނަ ނަގުދު ފައިސާ ގަވާއިދުން ޖަމާކޮށްފައި ނުވާކަންވަނީ ފާހަގަކޮށްފައެވެ،
މި އޮޑިޓް ރިޕޯޓުގައިވަނީ ކައުންސިލްގެ އާމްދަނީ ފައިސާ އާއި އެކައުންޓުތަކުން ނަގާފައިވާ ފައިސާގެ ތެރެއިން މަދުވާ ކަމަށް ބެލެވޭތީ އެ މައްސަލަ ތަހުގީގުކޮށް އެކަމުގައި ހިމެނޭ މީހުންނަށް ފިޔަވަޅު އެޅުމަށް އެދިފައެވެ. އަދި ފައިސާގެ ހަރަދުތަކާއި ލިޔުންތައް ބެލެހެއްޓުމުގައި އިހުމާލުވެފައިވާތީ އާއި އެ ހަރަދަކީ ކައުންސިލް އިދާރާގެ ބޭނުމަށް ކޮށްފައިވާ ހަރަދުތަކެއްކަން ކަށަވަރު ނުކުރެވޭތީ، އެ މައްސަލަ ތަހުގީގުކޮށް ޒިންމާވާ ފަރާތްތަކަށް ވެސް ފިޔަވަޅު އެޅުމަށް އަންގާފައިވެއެވެ.
