މޫސުމަށް އަންނަ ބަދަލުތަކަކީ ދިރިއުޅުމަށް ކުރާ މަސައްކަތްތަކާއި ކަނޑުގެ ދިރުންތަކާއި އަދި ރާޅާއެޅުންފަދަ ކަންކަމަށް ވެސް އޮތް ނުރައްކަލެއް ކަމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދު ވިދާޅުވެއްޖެއެވެ.
"އޭއެސްއެފް އޭސިއަން ސާފިން ޗެންޕިއަންޝިޕް 2024" ނިންމުމުގެ ރަސްމިއްޔާތުގައި އެކަމަނާވަނީ ކަނޑުތައް ހިމާޔަތް ކުރުމުގައި އަދާކުރަންޖެހޭ ފަރުދީ ޒިންމާގެ މައްޗަށް އަލިއަޅުއްވާފައެވެ. އަދި އަންނަން އޮތް ޖީލުތަކުގެ ރާޅާ އެޅުންތެރިންނަށް ކަނޑުތަކުން އުފަލާ ހިތްހަމަޖެހުން ލިއްބައިދިނުމަށްޓަކައި ކަނޑުތައް ހިމާޔަތްކުރުމަށް މަސައްކަތްކުރުމުގެ މުހިންމުކަމުގެ މައްޗަށް ވަނީ ވާހަކަފުޅު ދައްކާފައެވެ.
މީގެ އިތުރުން ސާޖިދާ ވަނީ ރާޅާއެޅުންފަދަ ހަރަކާތެއްގެ ނިމުން ފާހަގަކުރާއިރު ކަނޑުތަކުގެ ވެށި ހިމާޔަތްކުރުމުގެ މުހިންމުކަން ފާހަގަކުރައްވާފައެވެ. އަދި ކަނޑުތައް ހިމާޔަތްކުރުމަށާއި ޕްލާސްޓިކް ކުނި މަދުކުރުމަށާ އަދި ދެމެހެއްޓެނިވި ގޮތްތައް ކުރިއެރުވުމަށް މަސައްކަތް ކުރައްވާނެކަމުގައި ވިދާޅުވިއެވެ.
ރާޅާ އެޅުމުގެ މުބާރާތުގެ މައްޗަށް އަލިއަޅުއްވާލައްވަމުން ސާޖިދާ ވަނީ އެއީ ޝައުގުވެރިކަމާއި ހުނަރާ އަދި އެކުވެރިކަން ދައްކުވައިދޭ މުބާރާތެއްކަން ފާހަގަކުރައްވާ މުބާރާތުގެ ވަނަތައް ހޯދިފަރާތްތަކަށް މަރުހަބާ ވިދާޅުވެފައެވެ. އަދި އެ ކާމިޔާބީއަކީ އެކުޅުންތެރިން ނިސްބަތްވާ ގައުމަށް ލިބޭ ރީތިނަމެއްގެ އިތުރުން އެފަރާތްތަކުން އެކަމަށް ދެއްވި ސަމާލުކަމާއި ކުރެއްވި ބުރަ މަސައްކަތް ފެނިގެންދާ ކަމެއްކަން ފާހަގަކުރެއްވިއެވެ. އިތުރަށް ސާޖިދާ ވިދާޅުވީ ކުޅުންތެރިންގެ ކުޅުމާއި އަދި ހިތްވަރާއެކު ކުރާ މަސައްކަތުން އެހެން މީހުންނަށް ހިތްވަރު ލިބިދޭކަމަށާ އަދި އެއީ ކުޅިވަރުގެ ރޫހާ އެކުވެރިކަން އާލާކުރުމަށް މުހިންމުކަމެއްކަމުގައެވެ.
20 ގައުމަކުން ޖުމްލަ 113 އެތުލީޓުން ބައިވެރިވި މި އަހަރުގެ އޭޝިއަން ސާފިން ޗެންޕިއަންޝިޕް ކުރިއަށް ގެންދިޔައީ ކ. ތުލުސްދޫގައެވެ. މިއީ ރާއްޖޭގައި އޭޝިއަން ސާފިން ޗެންޕިއަންޝިޕް ބޭއްވި ދެވަނަ ފަހަރު ކަމުގައި ވީނަމަވެސް މިއީ މި މުބާރާތުގެ ކޮލިފިކޭޝަން ހަރަކާތެއް ރާއްޖޭގައި ބޭއްވި ފުރަތަމަ ފަހަރެވެ.
