ރާއްޖޭގައި ގަވާއިދާ ޚިލާފަށް ފުޅާދާއިރާއެއްގައި ބިއުޓީ ސެލޫންގެ ވިޔަފާރިކުރަމުން އައި ފަރާތެއް ކަމުގައިވާ "ރަޖަނީ ޝްރެސްތާ" ނުވަތަ އާއްމުކޮށް ކިޔާ ނަމުން ނަމަ 'ރިޒް' ނަމަކަށް ކިޔާ ބިދޭސީއަކުން ހައްޔަރުކޮށް ޑިޕޯޓްކޮށްފިއެވެ.
އިމިގްރޭޝަނުން ބުނީ ރިޒްއާ ބެހޭ ގޮތުން 'އިމިގްރޭޝަން ވޮޗް' އަށް ލިބުނު ރިޕޯޓަކާ ގުޅިގެން މިމަހުގެ 11 ވަނަ ދުވަހު ވަނީ ހާއްސަ އޮޕަރޭޝަނެއް ހިންގާފައި ކަމަށެވެ.
އަދި ރިޒް އަކީ އޭނައަށް ދޫކޮށްފައިވާ ހުއްދައިގެ (ވިސާގެ) ބޭރުން ގަވާއިދާ ހިލާފަށް ވިޔަފާރިކުރަމުން ދިއަ ފަރާތެއްކަން އެނގިފައިވާ ކަމަށް ވެސް އިމިގްރެޝަނުން ބުންޏެވެ. އިމިގްރޭޝަނުން ބުނީ ރިޒްއާ އޭނާގެ 04 ބިދޭސީ މުވައްޒަފުންގެ ސައްހަ ވިސާއެއް ނެތުމުގެ ސަބަބުން، އިމިގްރޭޝަން ބެލުމުގެ ދަށަށް ގެންދިޔަ ކަމަށެވެ.
އަދި މިމަހުގެ 13 ވަނަ ދުވަހު މި ފަސް މީހުން ވެސް ރާއްޖެއަށް އަނބުރާ ނާދެވޭ ޑިޕޯޓްކޮށްލާފައިވާ ކަމަށް ވެސް އިމިގްރޭޝަނުން ވަނީ ބުނެފައެވެ.
މިއަހަރުގެ ކުރީކޮޅުން ފެށިގެން އިމިގްރޭޝަނުން ދަނީ ބިދޭސީން ނުގަވައިދުން ރާއްޖޭގައި ހިންގާ އެކި އެކި ވިޔަފާރިތަކަށް އަމާޒުކޮށް ރެއިޑްތައް ހިންގާ ވިޔަފާރި ހިންގާ ތަންތަން ބަލާ ހަދަމުންނެވެ. އަދި އެތަންތަނުންގައި އުޅޭ ގަވައިދާ ހިލާފު ބިދޭސިން އިމިގްރޭޝަންގެ ބެލުމުގެ ދަށަށް ގެނެސް އެފަރާތްތައް ޑިޕޯޓްކުރުމުގެ މަސައްކަތްތައް ވެސް ކުރަމުންދާ ކަމަށް އިމިގްރޭޝަނުން މައުލޫމާތު ދެއެވެ.
