އާންމުކޮށް މާލެ ސަރަހައްދުގެ ގިނަ ފިހާރަތަކުގައި ހުންނަ ޒާތުގެ ތެލުލިފަތާއި، ލުއިކާނާ އަދި މަސްމިރުސް ފަދަ ބާވްތަތައް ފުޅާދާއިރާއެއްގައި ތައްޔާރު ކުރަމުން ދިޔަ ބިދޭސީންތަކެއް ހައްޔަރު ކޮށްފިއެވެ.
"އިމިގްރޭޝަން ވޮޗް" އަށް ލިބުނު މައުލޫމަތަކާ ގުޅިގެން އިމިގްރޭޝަންގެ އޮފިސަރުން ކުރި މަސައްކަތުން މިދިޔަ ހޯމަ ދުވަހު އަތުލީ މ. ތްރީ މޫން ބަލައި އެ މަސައްކަތުގައި އުޅެމުން ދިޔަ ބިދޭސީންތަކެކެވެ. އިމިގްރޭޝަނުން ބުނީ އެތަނުގެ 1 ވަނަ ފަންގިފިލާގައި ވިޔަފާރިއަށް ކާބޯތަކެތި ތައްޔާރުކޮށް، ބިދޭސީންނަށް ހާއްސަކޮށްގެން ކެފޭގެ ހިދުމަތް ވެސް ދެމުންދިޔަ ކަމަށެވެ.
އެތަނުން ގަވާއިދާ ހިލާފަށް އުޅެމުން ދިޔަ 10 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންދިޔައެވެ.
މީގެ އިތުރުން ގ. މޫންލައިޓްގައި ވެސް ގަވައިދާ ހިލާފު މަސައްކަތްތަކެއް ބިދޭސީން ކުރާ ކަމުގެ މައުލޫމާތު ލިބިގެން ހިންގި އޮޕަރޭޝަނެއްގައި 16 މީހަކު ވަނީ ހައްޔަރު ކޮށްފައެވެ. އެތާނގެ ދެވަނަ ފަންގިފިލާގައި ބިދޭސީންގެ އެކަމަޑޭޝަން ބްލޮކް ތަކެއް ހަދައި، ކުއްޔަށް ދޫކޮށްފައިވާ ކަމަށްވެސް މައުލޫމާތު ލިބެއެވެ.
އިމިގްރޭޝަނުން ބުނީ މި މީހުން ހައްޔަރުކޮށްފައި ވަނީ ގަވާއިދާ ހިލާފަށް އުޅޭ ބިދޭސީން ފުޅާދާއިރާއެއްގައި ވިޔަފާރިއަށް އެކި ކަހަލަ ކާބޯތަކެތި ތައްޔާރުކުރަމުންދާ ކަމަށް "އިމިގްރޭޝަން ވޮޗް" އަށް ލިބުނު މައުލޫމާތާ ގުޅިގެން ކަމަށެވެ.
