ބުޅާ މަސް އަޅައިގެން ތައްޔާރުކުރި ކާބޯތަކެތި ވިއްކަން ހުރި ފިހަރަތައްކަމަށް ބުނެ އިމިގްރޭޝަންގެ ނަމުގައި ދައުރުކުރަމުން އަންނަނީ 'ފޭކު' މެސެޖެއް ކަމުގައި އިމިގްރޭޝަން ކޮންޓްރޯލާ މުހައްމަދު ޝައްމާން ވިދާޅުވެއްޖެއެވެ.
ބުޅާ މަހުން ކާބޯތަކެތި އުފައްދާ އޭގެ ވިޔަފާރި ކުރަމުންދިޔަ މައްސަލައިގައި ބަންގަލަދޭޝްއަށް ނިސްބަތްވާ އުމުރުން 32 އަހަރުގެ އަރަފާތު ހައްޔަރުކޮށްފައިވާއިރު، އޭނާއަކީ ކާބޯތަކެތީގެ އެކި ބަވަތްތައް ތައްޔާރުކޮށް ފިހާރަތަކުގައި ވިއްކަމުންދާ މީހެކެވެ.
އެހެންކަމުން އޭނާ ކާބޯތަކެތި ތައްޔާރުކޮށް ވިއްކަމުންދާ ފިހާރަތަކުގެ ތަފްސީލު ހާމަކުރުމަށް ގިނަ ބަޔަކު ގޮވާލަމުން އަންނައިރު މިއަދު އިމިގްރޭޝަންގެ ނަމުގައި މިތަކެތި ވިއްކަން ހުރި ފިހާރަތައްކަމަށް ބުނެ ލިސްޓެއްވަނީ އާންމުކޮށްފައެވެ. އަދި މިތަންތަނުން ކާބޯތަކެތި ގަނެފައިވާ ފަރާތްތަކުން ޑޮކްޓަރުގެ އިރުޝާދާ އެކު ކުރިއަށް ދިއުމަށްވެސް އެދިފައިވެއެވެ.
ސޯޝަލް މީޑިއާގައި ދައުރުވަމުންދާ މި މެސެޖާއި ގުޅިގެން އެކަން ދޮގުކޮށް ޝައްމާން ވިދާޅުވީ އެއީ އިމިގްރޭޝަންގެ ނަމުގައި ދައުރުކުރަމުން އަންނަ ފޭކު މެސެޖެއްކަމުގައި ބުނެފައެވެ.
ޝައްމާންގެ މި ޕޯސްޓާއެކު، އާންމު ސިއްހަތާއި ރައްކާތެރިކަމާއި ގުޅޭ މިފަދަ ކަންކަމުގައި ސައްހަ ނޫން ހަބަރުތައް ފެތުރިގެން ދިއުމާއި ގުޅިގެން ގިނަ މައްސަލަތަކެއް ފެންމަތިވެދާނެކަމަށް ގިނަ ބަޔަކު ބުނަމުން އަންނައިރު، މިކަމާއި ގުޅުން ހުރި ސައްހަ މައުލޫމާތު ކަމާއި ގުޅުން ހުރި އިދާރާތަކުން ވިހާވެސް އަވަހަށް އާންމުކުރުމަށް ގިނަ ބަޔަކު އަންނަނީ ގޮވާލަމުންނެވެ.
