ބުޅާ މަސް އަޅައިގެން ކާބޯތަކެތި ތައްޔާރުކޮށް ވިއްކި ބަންގްލަދޭޝްގެ މީހާ އިމިގްރޭޝަނާ ހަވާލު ކޮށްފިއެވެ.
އެ މައްސަލައިގައި ފުލުހުން އިއްޔެ ހައްޔަރުކުރީ ބަންގްލަދޭޝަށް ނިސްބަތްވާ، އުމުރުން 32 އަހަރުގެ އަރްފަތު ހޮސައިނެވެ. ފުލުހުން އޭނާ ހައްޔަރުކުރީ ސިފަ ބަދަލުކުރުމަށް ސެލޫނަކަށް ގޮސް ވަދެ ހުއްޓައެވެ.
މީޑިއާއަށް ފޮނުވި މެސެޖެއްގައި ފުލުހުން މިއަދު ބުނީ، އަރްފަތު އިމިގްރޭޝަނާ އިއްޔެ ހަވާލުކޮށްފައިވާ ކަމަށާއި، އެ މައްސަލައިގެ ތަހްގީގު ކުރިއަށް ދާ ކަމަށެވެ.
އަރްފަތު ހޮސައިން ބުޅާ މަހުން ކާބޯތަކެތި ތައްޔާރުކުރާ މައްސަލަ ފެންމަތިވެފައި ވަނީ މީސްމީޑީއާގައެވެ. އެގޮތުން ފެލިން ވެލްފެއާ އޯގަނައިޒޭޝަން ނަމުގައި 'އެކްސް'ގައި ހަދާފައިވާ އެކައުންޓަކުން އެމީހާގެ ވަނަވަރު އާންމުކޮށް، އަރްފަތަކީ ގަވައިދާ ހިލާފަށް އުޅޭ ބިދޭސީއެއް ކަމާއި، އޭނާ އަންނަނީ ބުޅާ މަސް އަޅައިގެން ކާބޯތަކެތި އުފައްދަމުން ކަން ހާމަކޮށްފައިވެއެވެ.
މި މައްސަލައާ ގުޅިގެން އޭނާ ހޯދުމަށް އިމިގްރޭޝަނުން އާންމުކޮށް އިއުލާނުކުރީ މިދިޔަ ހޯމަ ދުވަހުގައެވެ.
މީގެ އިތުރުން ވެސް، ގަވައިދާ ހިލާފަށް އުޅެމުން ދިޔަ ފަސް ބިދޭސިއަކު ހޯމަ ދުވަހު އިމިގްރޭޝަންގެ ބެލުމުގެ ދަށަށް ގެންދިޔައެވެ.
