ސާފުތާހިރުކަން އިންތިހާއަށް ކުޑަކޮށް ކޮށި ފޯއް ވިއްކަމުން ދިޔަ ބިދޭސީންތަކެއް ހައްޔަރުކޮށްފިއެވެ.
އިމިގްރޭޝަނުން ބުނީ ގަވައިދާ ހިލާފަށް އުޅޭ ބިދޭސީން އަތުލައިގަތުމަށް ހިންގަމުންދާ އޮޕަރޭޝަނުގެ ތެރެއިން އިއްޔެ ހިންގުނު ހާއްސަ ރެއިޑުގައި މ. ރީތި އޯކިޑް ނަމަކަށް ކިޔުނު ގެއެއް ބަލާ ފާސްކުރެވުނު ކަމަށާއި އެގޮތުން ގަވައިދާ ހިލާފަށް އުޅެމުންދިއަ 2 ބިދޭސީއަކު އިމިގްރޭޝަން ބެލުމުގެ ދަށަށް ގެނެވިފައިވާ ކަމަށެވެ.
އިމިގްރޭޝަނުން ބުނީ އެ ތަނަކީ ފޯއް ތައްޔާރުކޮށް އޭގެ ވިޔަފާރިކުރާ ތަނެއް ކަމަށާއި އެ ތަނުގެ ސާފުތާހިރުކަން އިންތިހާއަށް ދަށްވުމުން ކަމާ ބެހޭ އިދާރާތަކަށް އެ މައުލޫމާތު ހިއްސާކޮށްފައިވާ ކަމަށެވެ.
އިމިގްރޭޝަނުން ހިއްސާ ކޮށްފައިވާ ފޮޓޯ ތަކުން ފެންނަ ގޮތުގައި ފާހާނާއެއްގެ ކުރިމަތީ ގޯންޏެއްގެ މައްޗަށް ފޯއްތަށް އުކާލާފައި ހުރި އިރު އެ ތަނަކީ ސާފު ތާހިތުކަން އިންތިހާއަށް ކުޑަ ތަނެކެވެ.
ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރުމަށް ރައްޔިތުން ދޭ އެއްބާރުލުން ފާހަގަކޮށް އިމިގްރޭޝަނުން ވަނީ ޝުކުރު އަދާކޮށްފައެވެ. އަދިވެސް މިފަދަ މައްސަލަތައް "އިމިގްރޭޝަން ވޮޗް" މެދުވެރިކޮށް ރިޕޯޓު ކުރަމުން ދިއުމަށް ވެސް އިމިގްރޭޝަނުން ވަނީ އެދިފައެވެ. ގަވައިދާ ހިލާފަށް އުޅޭ ބިދޭސީން ރިޕޯޓް ކުރުމަށް އޮންލައިން ޕްލެޓްފޯމް "އިމިގްރޭޝަން ވޮޗް" އިފްތިތާހުކޮށްފައިވަނީ މިިދިޔަ ޖުލައި މަހުގެ 17 ވަނަ ދުވަހު އެވެ.
