މަގުމަތީގެ ރައްކާތެރިކަން ދެމެހެއްޓޭނީ މުޖުތަމައުގެ ވިސްނުން މިކަމުގައި ވަރަށް ބޮޑަށް ބަދަލުކޮށްގެން ކަމަށް ހޯމް މިނިސްޓަރު އަލީ އިހްސާން ވިދާޅުވެއްޖެއެވެ.
"ރައްކާ" ރޯޑް ސޭފްޓީ ޕްރޮގްރާމްއަށް 10 އަހަރު ފުރުން ފާހަގަކުރުމަށް ފުވައްމުލައް ސިޓީގައި ބޭއްވި ރަސްމިއްޔާތުގައި އަލީ އިހްސާން ވިދާޅުވީ ގައުމަށް އަންނަމުންދާ ތަރައްގީ އާ އެއްވަރަށް ސިކުނޑިތައް ވެސް ތަރައްގީވާން ޖެހޭ ކަމަށެވެ. ގާނޫނުތައް ތަންފީޒު ނުކޮށް ދޫކޮށްލާފައި އޮތްއިރު އެކަމުން ފައިދާތަކެއް ލިބުނު މީހުން އުޅޭކަން ފާހަގަ ކުރައްވައި އަލީ އިހްސާން ވިދާޅުވީ ގާނޫނުތައް ތަންފީޒު ކުރަން ފެށުމުން އެފަދަ މީހުންނަށް އުނދަގޫ ވެގެން ދިޔަކަމަށެވެ.
މީގެ އިތުރުން އަލީ އިހްސާން ވިދާޅުވީ ގާނޫނު ތަންފީޒުކޮށް، ކަންކަން ހައްލުކުރަން އަޅާ ފިޔަވަޅަކީ ބައެއް ހައްގު ނިގުޅައިގަތުން ކަމަށް ދެކޭ ވިސްނުން ބަދަލުވާން ޖެހޭކަމަށެވެ. އަދި މިފަދަ މީހުންގެ ހައްގު ހޯދައިދޭން ކަމަށް ބުނެ އަޅާ ބައެއް ފިޔަވަޅުތަކުން، މުޖުތަމައުގެ ކަންކަން ގޯހުން ގޯހަށް ދާތަން ފެނިވަޑައިގެންފައި ވާކަމަށް ވެސް މިނިސްޓަރު ވަނީ ފާހަގަ ކުރައްވާފައެވެ.
"ރައްކާ" ރޯޑް ސޭފްޓީ ޕްރޮގްރާމްއަކީ މަގުމަތީގެ ސަލާމަތާ ރައްކާތެރިކަމަށް އާއްމުންގެ ހޭލުންތެރިކަން އިތުރުކޮށް، މަގުމަތީގައި ހިނގާ ނުރައްކާތެރި ހާދިސާތައް މަދުކުރުމަށް ދިވެހި ފުލުހުންނާއި އެލައިޑް އިންޝުއަރެންސް ގުޅިގެން 2014 ވަނަ އަހަރު ފެށި ޕްރޮގްރާމެކެވެ.
