އިގްތިސާދީ ގޮތުން ދަތި މި ދަނޑިވަޅުގައި މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް 5 މެނޭޖިން ޑިރެކްޓަރުން ނެގުމަކީ މާލީ ބުރައެއް ކަމަށް އެމްއެންޕީގެ ލީޑަރު މުހައްމަދު ނާޒިމް ވިދާޅުވެއްޖެއެވެ.
ނާޒިމް ވިދާޅުވީ އެމްއެމްއޭއަށް 5 މެނޭޖިން ޑިރެކްޓަރުން އައްޔަން ކުރުމަކީ ދައުލަތުން އުފުލަންޖެހޭ އިތުރު މާލީީ ބުރައެއްކަމަށާއި، ހަރަދު ކުޑަ ކުރުމަށް ލީޑަޝިޕްގެ ސްޓްރަކްޗާ ހަރުދަނާކުރުމަށް އެމްއެމްއޭގެ ގަވަރުނަރަށް އިލްތިމާސްކުރައްވާ ކަމަށެވެ.
އެމްއެމްއޭ އިން ވަނީ އެ އިދާރާގެ ފަސް މެނޭޖިން ޑިރެކްޓަރުންގެ މަގާމަށް، ހުނަރުވެރި ގާބިލް އަދި އިހްލާސްތެރިކަމާ އެކު ކުރިއަށް ދިއުމަށް ޝައުގުވެރިވާ މީހުން ބޭނުންވާ ކަމަށް ބުނެ މި މަހުގެ 8 ވަނަ ދުވަހު އިއުލާނެއް ނެރެފައެވެ.
އެގޮތުން މެނޭޖިން ޑިރެކްޓަރުން އައްޔަންކުރާ ފަސް ދާއިރާ އަކީ މަނިޓަރީ ޕޮލިސީ، ރިސާޗް އެންޑް ސްޓެޓިސްޓިކްސް އާއި ފައިނޭންޝަލް ސްޓެބިލިޓީ އާއި ބޭންކިން އޮޕަރޭޝަންސް އާއި ކޯޕޮރޭޓް ސަވިސަސް އަދި ފައިނޭންޝަލް ސެކްޓާ ޑިވަލަޕްމަންޓް އެވެ. މި ފަސް މަގާމުގެ ވެސް މުސާރަ އާއި އިނާޔަތަކީ 50,000 ރުފިޔާއާއި 55,000 ރުފިޔާގެ އަދަދެއް ކަމަށް އެމްއެމްއޭ އިން ބުނެއެވެ.
މެނޭޖިން ޑިރެކްޓަރުގެ މަގާމުގެ މުއްދަތަކީ ފަސް އަހަރުގެ ދެ ދައުރެވެ. އެ މަގާމަށް ކުރިމަތިލުމުގެ ފުރުސަތު އެމްއެމްއޭގައި މަސައްކަތްކުރާ މީހުންނަށް ވެސް އެބަ އޮތް ކަމަށް އެ އިއުލާންގައި ބުނެފައި ވެއެވެ.
އެމްއެމްއޭގެ ޒަމާނީ ސެންޓްރަލް ބޭންކަކަށް ހެދުމުގެ ބޭނުމުގައި އެ އިދާރާގެ ހިންގުމުގެ އޮނިގަނޑަށް ބޮޑު ބަދަލުތަކެއް ގެންނަން ނިންމެވީ އާ ގަވަރުނަރު އަހުމަދު މުނައްވަރެވެ. އެމްއެމްއޭގެ ބޯޑުން ފާސްކޮށްފައި ވަނީ އެސިސްޓެންޓް ގަވަރުނަރުގެ މަގާމު، މެނޭޖިން ޑިރެކްޓަރުގެ މަގާމަށް ބަދަލުކުރުމަށެވެ. އެ ބަދަލާ އެކު، މިހާރު ތިއްބެވި އެސިސްޓެންޓް ގަވަރުނަރުން ވަނީ އެޑްވައިޒަރުންގެ މަގާމަށް ޕްރޮމޯޓް ކޮށްފައެވެ.
