އެކިއެކި ދާއިރާތަކުން އިންޑިއާ އިން ރާއްޖެއާ އެކު ކުރިއަށް ގެންދާ މަޝްރޫއުތަކުގެ ތެރޭގައި ހިމެނިގެން ސިވިލް ސާވިސްގެ މުވައްޒަފުން ތަމްރީނު ކުރާ ޕްރޮގްރާމުގެ އެއްބަސްވުން އާކޮށްފިއެވެ.
މި އެއްބަސްވުމުގެ ދަށުން ސިވިލް ސާވިސްގެ އިތުރު 1000 މުވައްޒަފުން ތަމްރީނު ކުރެވިގެންދާނެ ކަމަށް ފޮރިން މިނިސްޓްރީން ބުނެފައި ވެއެވެ.
އިންޑިއާގެ ހާރިޖީ ވަޒީރު ޑރ. ޖައިޝަންކަރު ރާއްޖެއަށް މިހާރު ކުރައްވާ 3 ދުވަހުގެ ދަތުރުގައި، އިންޑިއާގެ އެހީގައި ރާއްޖޭގައި ހިންގާފައި ވާ ބައެއް މަޝްރޫއުތައް ވަނީ އިފްތިތާހު ކޮށްފައެވެ.
ރާއްޖޭގެ ހާރިޖީ ވުޒާރާގައި ބޭއްވި ރަސްމިއްޔާތެއްގައި ވާޗުއަލް ކޮށް އިފްތިތާހު ކުރި މަޝްރުއުތަކަކީ؛
- ކުޅުދުއްފުށީ ރީޖަނަލް ހޮސްޕިޓަލުގައި ސްޕީޗް ތެރަޕީ ޔުނިޓެއް ޤާއިމުކުރުން.
- ގދ. ތިނަދޫ އަބޫބަކުރު ސްކޫލް، ލ.ގަން އިހައްދޫ ސްކޫލް ހއ. ދިއްދޫ އޭއީސީ ގައި އިންކްލޫސިވް ސަޕޯޓް ޔުނިޓްތައް ހަރުދަނާކުރުން.
- ތ. ތިމަރަފުށި، ތ. ވޭމަންޑޫ، އަދި ގއ. ކޮނޑޭގައި މަގުބައްތި މަޝްރޫއުތައް ހަރުކުރުން.
- ރ. އުނގޫފާރު ހޮސްޕިޓަލުގައި ގާއިމު ކުރި މެންޓަލް ހެލްތު ޔުނިޓް އިފްތިތާހު ކުރުން.
މީގެ އިތުރުން އިންޓަގްރޭޓެޑް ޕޭމަންޓް ސިސްޓަމާ ބެހޭ މެމޮރެންޑަމް އޮފް އަންޑަސްޓޭންޑިން (އެމްއޯޔޫ) ބަދަލުކުރުންވެސް މި ރަސްމިއްޔާތުގައި ކުރިއަށް ގެންގޮސްފައި ވެއެވެ.
އިންޑިއާ އަކީ ރާއްޖޭގެ ތަރައްގީގައި މުހިންމު ބައިވެރިއެއް ކަމަށާއި އިންޑިއާއިން ރާއްޖެއަށް ވެދެމުން ގެންދާ އެހީތެރިން ފާހަގަ ކޮށް ދެގައުމުގެ ގުޅުން އިތުރަށް ބަދަހި ކުރައްވާނެ ކަމަށް ދެގައުމުގެ ހާރިޖީ ވަޒީރުން ވިދާޅުވެފައި ވެއެވެ.
އިންޑިއާގެ ހާރިޖީ ވަޒީރު ރާއްޖެއަށް މިހާރު ކުރައްވާ ދަތުރުގައި އިންޑިއާގެ އެގްޒިމް ބޭންކުގެ އެހީގައި ކުރިއަށް ދާ މާލެ-ވިލިނގިލި ބްރިޖްގެ މަސައްކަތް ބައްލަވާލެއްވުމާއި އައްޑޫގެ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫއުގެ އިތުރުން ހަންކެޑެ ވަށައިގެން މަރަދޫ އާއި ހިތަދޫ ގުޅުވައިދޭ 1.463 ކިލޯމީޓަރުގެ 4 ލޭންގެ ލިންކް ރޯޑް އިފްތިތާހު ކުރެއްވުން ހިމެނެއެވެ.
