އިންޑިއާއަށް ވިއްކާފައިވާ ޓެރެޒަރީ ބިލްތަކަށް ދައްކަން ޖެހޭ ފައިސާގެ ތެރެއިން 50 މިލިއަން ޑޮލަރު ރޯލްއޯވާ ނުވަތަ ދެއްކުން ފަސްކޮށްދީފައި ވުމަކީ ރާއްޖޭގެ މާލީ ގޮންޖެހުންތަކަށް ލިބިގެން ދިޔަ ވަރަށް ބޮޑު ލުޔެއް ކަމަށް ދިވެހި ސަރުކާރުން ބުނެފިއެވެ.
ރަސްމީ ދަތުރެއްގައި މިހާރު ރާއްޖެ ވަޑައިގެން އުޅުއްވާ އިންޑިއާގެ ހާރިޖީ ވަޒީރު ޑރ. ޖައިޝަންކަރާއެކު ފޮރިން މިނިސްޓްރީގައި ބޭއްވި ބައްދަލުވުންތަކަށް ފަހު ރާއްޖޭގެ ހާރިޖީ ވަޒީރު ދެއްވި ސްޓޭޓްމަންޓުގައި ވިދާޅުވީ، އިންޑިއާ އިން ދިން އެ ލުޔާއެކު މާލީ ގޮންޖެހުންތަކަށް ވަރަށް ބޮޑު ކުރިއެރުމެއް ލިބިގެން ގޮސްފައި ވާ ކަމަށެވެ.
ކުރީގެ ސަރުކާރުން އިންޑިއާއަށް ވިއްކާފައި ވާ ޓްރެޒަރީ ބިލްތަކަށް އަންނަ މަހުގެ ނިޔަލަށް 200 މިލިއަން ޑޮލަރު ދައްކަން އޮތް ނަމަވެސް އޭގެ ތެރެއިން 50 މިލިއަން ޑޮލަރު ވަނީ ރޯލްއޯވާ ކޮށްދީފައެވެ. ނުވަތަ ދެއްކަން އޮތް މުއްދަތު ފަސްކޮށްދީފައެވެ.
މިއަދުގެ އިތުރުން އަންނަ ސެޕްޓެމްބަރުގެ ނިޔަލަށް ދައްކަން ޖެހޭ 150 މިލިއަން ޑޮލަރު އަދި އެބައޮތެެވެ. މީގެ އިތުރުންވެސް ނިމިދިޔަ ސަރުކާރުގައި މާލީ އެކި އިދާރާތަކުން ނަގާފައި ވާ ދަރަނި ދައްކަން ޖެހޭ މުއްދަތުތައް ބޯމަތިވެފައި ވާ އިރު އަންނަ މަހުގެ ނިލަޔަކަށް އިތުރު 255 މިލިއަން ޑޮލަރު ދައްކަން ޖެހެއެވެ.
މި ދަރަންޏާ މެދު ދިވެހި ސަރުކާރުން އަޅާފައިވާ ފިޔަވަޅުތައް އަދި ސާފުވާގޮތެއް ނުވެއެވެ.
އިންޑިއާގެ ހާރިޖީ ވަޒީރު ރާއްޖެއަށް މިހާރު ކުރައްވާ ދަތުރުގައި އިންޑިއާގެ އެގްޒިމް ބޭންކުގެ އެހީގައި ކުރިއަށް ދާ މާލެ-ވިލިނގިލި ބްރިޖްގެ މަސައްކަތް ބައްލަވާލެއްވުމާއި އައްޑޫގެ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫއުގެ އިތުރުން ހަންކެޑެ ވަށައިގެން މަރަދޫ އާއި ހިތަދޫ ގުޅުވައިދޭ 1.463 ކިލޯމީޓަރުގެ 4 ލޭންގެ ލިންކް ރޯޑް އިފްތިތާހު ކުރެއްވުން ހިމެނެއެވެ.
އަދި ރާއްޖޭގެ 28 ރަށެއްގައި އިންޑިއާގެ އެހީގައި ހިންގި ފެނާއި ނަރުދަމާގެ 28 މަޝްރޫއު ދިވެހި ސަރުކާރާ ހަވާލު ކުރުންވެސް ހިމެނެއެވެ.
މިނިސްޓަރު ޒަމީރުގެ ވާހަކައިގައި، ރާއްޖެއާއި އިންޑިއާގެ ގުޅުމުގެ މުހިންމު ކަމުގެ މައްޗަށް އަލިއަޅުވާލައްވަމުން ވިދާޅުވެފައި ވަނީ، ސަލާމަތާއި ދިފާއީ ދާއިރާގައި ޖޮއިންޓް އެކްސަސައިޒްތައް ކުރިއަށް ގެންގޮސް، ދެގައުމުގެ އޮފިސަރުންނަށް ތަމްރީނުގެ ފުރުސަތުތައް ފުޅާކުރަން ދެފަރާތުން އެއްބަސްވާ ކަމަށެވެ. އަދި ޓެރަރިޒަމާ ދެކޮޅަށް މަސައްކަތްކުރުމާއި، އަނިޔާވެރި ހަރުކަށި ފިކުރުތަކާއި، މަސްތުވާތަކެއްޗާއި، އިންސާނީ ވަގުފާރިއައި، އިންސާނީ ހައްގުތައް ކުރިއެރުވުމާއި ހިމާޔަތްކުރުމުގެ މައްސަލަތަކުގައި އެއްބާރުލުން ދީ ދެމިތިބުމަށް ވެސް ދެގައުމުން އެއްބަސްވާކަމަށް ޒަމީޒު ވިދާޅުވިއެވެ.
އިންޑިއާގެ ހާރިޖީ ވަޒީރު ރާއްޖެއަށް މި ވަޑައިގެންނެވީ ދެގައުމުގެ ދެމެދުގައި ސިޔާސީ ނުތަނަވަސް ކަމެއް އުފެދި ދުވަސްކޮޅަކަށް ދުރުގައި ތިބުމަށް ފަހުއެވެ.
