ހައްޖުގެ އަޅުކަމަށް ފަހު، ދިވެހި ހައްޖާޖީންގެ ފުރަތަމަ ގްރޫޕު ހޯމަ ދުވަހު މާލެއަށް އަންނާނެ ކަމަށް އިސްލާމިކް މިނިސްޓްރީ އިން ބުނެފިއެވެ.
އިސްލާމިކް މިނިސްޓްރީ އިން ބުނީ 1445 ވަނަ އަހަރު ރާއްޖެއިން ހައްޖަށް ދިޔަ ހައްޖުވެރިން ހައްޖުގެ އަޅުކަން ފުރިހަމަ ކުރުމަށް ފަހު މިހާރު ފުރުމަށް ތައްޔާރުވެފައި ވާ ކަމަށެވެ.
ހައްޖުވެރިން ރާއްޖެ އަންނަން ހަމަޖެހިފައި ވަނީ:
- ޖޫން 24 - ހޯމަ
- ޖޫން 28 - ހުކުރު
- ޖުލައި 01 - ހޯމަ
- ޖުލައި 04 - ބުރާސްފަތި
ރާއްޖެއިން ހައްޖަށް ދިޔަ ހައްޖުވެރިންގެ ތެރެއިން މިހާތަނަށް ނިޔާވީ އެކަކުކަން އިސްލާމިކް މިނިސްޓްރީ އިން ފާހަގަ ކުރެއެވެ. އަދި މި ވަގުތު ހޮސްޕިޓަލުގައި އެކަކު އޮތްއިރު އާންމު ގޮތެއްގައި ހައްޖުވެރިންގެ ހާލު ރަނގަޅު ކަމަށް އެ މިނިސްޓްރީ އިން ވަނީ ބުނެފައެވެ.
ހައްޖުގެ އަޅުކަން އަދާކުރެއްވުމަށް ފަހު، އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވަނީ މިއަދު ރާއްޖެ ވަޑައިގެންފައެވެ.
މިއަހަރު ސައުދީ އަރަބިއްޔާއިން ރާއްޖެއަށް ދިން 1،000 ކޯޓާ މިފަހަރު ސަރުކާރުން ދީފައި ވަނީ ހައްޖު ކޯޕަރޭޝަނަށެވެ. އެގޮތަށް ނިންމާފައި ވަނީ ވަރަށް ގިނަ ޖަމާއަތްތަކުން މީހުން އަތުން ފައިސާނެގުމަށް ފަހު ހައްޖަށް ނުދެވުމުގެ މައްސަލަތަކުގެ އިތުރުން ބިޑް އުސޫލުން ކޯޓާ ނެގުމަށްފަހު، ބޮޑު އަގުގައި ކޯޓާ ވިއްކާ މައްސަލައަށް ހައްލު ހޯދައި ދިނުމަށް ކަމަށް އިސްލާމިކް މިނިސްޓްރީން ވަނީ ބުނެފައެވެ.
