މާލޭގެ މާފަންނުން ފެނުނު ބޮޑު ޕައިތަން ހަރުފައެއް ސިފައިން ހިފައިފިއެވެ.
މި ހަރުފަ ހިފާ ވީޑިއޯއެއް ސޯޝަލް މީޑިއާގައި ދައުރުވަމުން ދާއިރު ވީޑިއޯއިން ފެންނަ ގޮތުގައި އެ ހަރުފަ އޮތީ ފާރެއްގެ ކައިރީގައެވެ. އަދި ފުލުހުން ހާއްސަ ދަނޑިއެއް ކަހަލަ އެއްޗެއް ބޭނުންކޮށްގެން އެ ހަރުފަ ހިފަން މަސައްކަތް ކުރާތަން ވީޑިއޯއިން ފެންނަ އިރު ބަލާ ބެލުމަށްް އެ ހަރުފައިގައި ފަސްވަރަކަށް ފޫޓު ހުންނާނެ އެވެ.
މާލެ އިން ދޭތެރެ ދޭތެރެއިން މީގެ ކުރިންވެސް މިފަދަ ހަރުފަ ވަނީ ފެނިފައެވެ. އެގޮތުން މިދިޔަ ފެބްރުއަރީ މަހު 17 ވަނަ ދުވަހު މާލޭ ޓިމްބާ ހައުސް [ލަކުޑި ގުދަނެއް] އިން ވަނީ ޕައިތަން ހަރުފައެއް ފެނިފައެވެ.
މި ހަރުފަ ފެނުމާއެކު ސިފައިންނަށް ވަނީ ރިޕޯޓު ކޮށްފައެވެ. އަދި ހަރުފަ ވަނީ ސިފައިންގެ ބެލުމުގެ ދަށަށް ގެންގޮސް ނައްތާލާފައެވެ. "ދަ ޕްރެސް" އަށް މައުލޫމާތު ދެއްވަމުން އެމްއެންޑީއެފް އިން ބުނީ މި ހަރުފައިގެ ސަބަބުން އެއްވެސް މީހަކަށް ގެއްލުމެއް ލިބިފައި ނުވާ ކަމަށާއި މިފަދަ ހާލަތްތަކުގައި އަމަލު ކުރަން ޖެހޭ އުސޫލުން އަމަލު ކުރަމުން ދާކަމަށެވެ.
ހަރުފައިގެ އިތުރުން ކިނބޫ ފަދަ ތަކެތިވެސް ދޭތެރެ ދޭތެރެއިން ރާއްޖޭގެ އެކި ހިސާބުތަކުގެ ގޮނޑުދޮށާ ކައިރިން ދަނީ ފެންނަމުންނެވެ.
