އިންޑިއާގެ އާންމު އިންތިހާބު 2024ގައި ބާރަތިޔާ ޖަނާތާ ޕާޓީ (ބީޖޭޕީ) އާއި އެޕާޓީ އިސްވެ އޮވެ އުފައްދާފައިވާ ނޭޝަނަލް ޑިމޮކްރަޓިކް އެލަޔަންސް (އެންޑީއޭ) ހޯދި ކާމިޔާބީ ފާހަގަކުރައްވައި އިންޑިއާގެ ބޮޑުވަޒީރު ނަރެންދުރަ މޯދީއަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ތަހުނިޔާ ދަންނަވައިފިއެވެ.
ރައީސް މުއިއްޒު އެކްސްގައި ކުރެއްވި ޕޯސްޓުގައި ވަނީ ބީޖޭޕީ އިން ތިންވަނަ ދައުރަކަށް އިންތިހާބު ކާމިޔާބު ކޮށްފައި ވާކަން ފާހަގަ ކުރައްވާފައެވެ. އަދި ތަރައްގީއާ ހަމަޖެހުން ހޯދުމަށް ދެ ގައުމު ގުޅިގެން ކުރެވޭ މަސައްކަތް އިތުރުވެގެންދާނެ ކަމަށް އުންމީދުކުރައްވާ ކަމުގައި ރައީސްގެ މެސެޖުގައި ވަނީ ވިދާޅުވެފައެވެ.
އިންޑިއާގެ އާންމު އިންތިހާބުގައި 640 މިލިއަން މީހުން ވޯޓުލާފައިވެއެވެ. އިންޑިއާގެ ގާނޫނު ހަދާ މަޖިލީހުގެ ލޯވާ ހައުސް ގައި ޖުމްލަ 543 މެމްބަރުން ތިބޭއިރު، މެޖޯރިޓީ ހޯދުމަށް އޭގެ ތެރެއިން 272 ގޮނޑި ކާމިޔާބު ކުރަންޖެހެއެވެ. އެހެންނަމަވެސް ބޮޑުވަޒީރު ނަރެންދުރަ މޯދީގެ ވެރިކަންކުރާ ބާރަތިޔާ ޖަނަތާ ޕާޓީ އަށް މި އިންތިހާބުގައި ކާމިޔާބުކުރެވިފައިވަނީ 240 ގޮނޑިއެވެ. މި އިންތިހާބުގައި އިންޑިއަން ނޭޝަނަލް ކޮންގްރެސް ޕާޓީ އިސްވެ އޮވެ ހަދާފައިވާ އިދިކޮޅު އިންޑިއާ އިއްތިހާދަށް 222 ގޮނޑި ވަނީ ލިބިފައެވެ.
މޯދީ އެންމެ ފުރަތަމަ އިންޑިއާގެ ބޮޑުވަޒީރު ކަމަށް އިންތިހާބުވީ 2014 ވަނަ އަހަރުއެވެ. އެއަށްފަހު 2019 އަހަރުވެސް އޭނާ ވަނީ ބޮޑު އަޣުލަބިއްޔަތަކުން އިންޑިއާގެ ބޮޑުވަޒީރުކަމަށް އިންތިހާބުވެފައެވެ.
