ކުރީގެ ރައީސް އިބްރާހިމް މުހައްމަދު ސޯލިހުގެ ރަށުގައި ފެނުގެ މައްސަލަ ހައްލުނުވެ ޓައްޕު ހިފައިގެން އުޅޭތާ ތިން އަހަރުވެއްޖެ ކަމަށް ހިންނަވަރު ދާއިރާގެ މެންބަރު މުހައްމަދު އަބްދުއްރަހްމާން ވިދާޅުވެއްޖެއެވެ.
މުހައްމަދު މިފަދައިން ވިދާޅުވީ އައްޑޫ ސިޓީ ހިތަދޫ އާއި ގުޅިފައިވާ މަރަދޫއާއި މަރަދޫފޭދޫ އަދި ފޭދޫއަށް ފެނަކައިން ދެމުން އައި ފެނުގެ ހިދުމަތް ނުލިބޭތީ ރައްޔިތުން މަޖިލީހަށް ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ހުށަހެޅުއްވި ކުއްލި މައްސަލައަށް ބަހުސްކުރައްވަމުންނެވެ.
މުހައްމަދު ވިދާޅުވީ ނާޒިލް ހުށަހެޅުއްވި އެ މައްސަލަ ބަލައިގަތުމަކީ ރައްޔިތުންނާ ގުޅުން ހުރި މިފަދަ މައްސަލަތަކުގައި 20 ވަނަ ރައްޔިތުންގެ މަޖިލީހުން ހައްލު ހޯދައިދިނުމަށް މަސައްކަތް ކުރާނެ ކަމުގެ ފުރިހަމަ ދަލީލެއް ކަމަށެވެ.
ނާޒިލް މިއަދު ވިދާޅުވީ އައްޑޫގެ އެ މައްސަލައަށް ދެ މަސް ދުވަސްވެފައިވާއިރު ފެން އިސްކުރާ ދިމާލުގައި ބޮޑު ބާލިދީއެއް ބަހައްޓާފައި އިސްކުރު ދޫކޮށްފައި ބަހައްޓަން ޖެހިފައިވާ ކަމަށެވެ. އަދި ފެން ލިބޭ ގަޑި ސާފުނުވާއިރު އިސްކުރުން ފެން އައިސްގެން ބާލިދީ ފުރިގެން ބާލިދީއިން ފެންތައް ފައިބައިގެން ގޮސް މީޓަރަށް އަރާ ލާރި ދައްކަން ޖެހެނީ ރައްޔިތުން ކަމަށް ނާޒިލް ވިދާޅުވިއެވެ.
ނާޒިލްގެ އެ ވާހަކައާ ގުޅިގެން މުހައްމަދު ވިދާޅުވީ ފެނުގެ މައްސަލައަކީ ހަމަ އެކަނި އައްޑޫއަށް ދިމާވެގެން އުޅޭ މައްސަލައެއް ނޫން ކަމަށާއި ހިންނަވަރުގައިވެސް ހަމަ އެފަދަ ހާލަތެއްގައި ޓައްޕު ހިފައިގެން އުޅޭތާ މިހާރު ތިން ވަރަކަށް އަހަރުވެފައިވާ ކަމަށެވެ. އަދި ހިންނަވަރަކީ ކުރީގެ ރައީސްގެ ރަށް ކަމަށް ވެސް މުހައްމަދު ވަނީ ފާހަގަކުރައްވާފައެވެ.
މުހައްމަދު ވިދާޅުވީ ކުރީގެ ރައީސްގެ ރަށުގެ ހާލަތު އެފަދައިން ހުރިއިރު ދެން ހުރި ރަށްތަކުގެ ހާލަތު އިހުސާސްކުރެވޭ ކަމަށެވެ. އަދި މިއަދުގެ މަޖިލީހުގެ މަސައްކަތްތައް ފެށި ކޮމިޓީތައް އެކުލަވާލުމުން މި ކަހަލަ އަސާސީ ހިދުމަތްތައް ލިބުމުގައި ހުރި ދަތިތަކާއި ގޮންޖެހުންތައް ދެނެގަނެ، އެކަންކަން ހައްލުކުރުމަށް ބޭނުންވާ ކަންތައްތައް ކޮށްދިނުމަށް އެހީތެރިވާނެ ކަމަށް ވެސް މުހައްމަދު ވަނީ ވިދާޅުވެފައެވެ.
