ދިވެހިރާއްޖެއިން މިއަހަރު ހައްޖަށްދާ ހައްޖުވެރިންގެ ފުރަތަމަ ބެޗު މާދަމާ ފުރާނެ ކަމަށް ދިވެހިރާއްޖޭގެ ހައްޖު މިޝަންއިން ބުނެފިއެވެ.
ހައްޖު މިޝަންއިން ބުނީ މިއަހަރުގެ ހައްޖާޖީން މައްކާއަށް ދިއުމަށް ހަމަޖެހިފައި ވަނީ 3 ފްލައިޓެއްގައި ކަމަށެވެ.
އެގޮތުން ފުރަތަމަ ބެޗު މާދަމާ ފުރުމަށް ހަމަޖެހިފައި ވާއިރު މި ބެޗުގައި 298 މައްކާއަށް ދިއުމަށް ހަމަޖެހިފައިވެއެވެ. އަދި 2 ވަނަ ބެޗު (353 މީހުން) ހޯމަ ދުވަހު ފުރުމަށް ހަމަޖެހިފައިވާއިރު އެންމެ ފަހު ބެޗް (339 މީހުން) ފުރުމަށް ހަމަޖެހިފައިވަނީ އަންނަ މަހުގެ 7 ވާ ހުކުރު ދުވަހުއެވެ.
ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅުގެ ދަށުން ދައުލަތުގެ ހަރަދުގައި ހައްޖަށް ފޮނުވާ 1،000 މީހުންގެ ތެރެއިން މި އަހަރު ހައްޖަށް ފޮނުވުމަށް ހަމަޖެހިފައިވާ 50 ފަގީރުން ވެސް މީގެ ތެރޭގައި ހިމެނެއެވެ.
މާދަމާ ހައްޖަށް ދާ ހައްޖުވެރިންގެ ފޮށިތައް ހަވާލުކުރުން މިހާރު ފެށިގެން ކުރިއަށްދާ ކަމަށް އިސްލާމިކް މިނިސްޓްރީއިން ވަނީ ބުނެފައެވެ. ހައްޖަށް ފުރާ މީހުންނަށް އެއާޕޯޓްއަށް ދެވޭނެ ފަސޭހަ ގޮތެއް ހަމަޖައްސައި ދިނުމަށްޓަކައި އިސްލާމިކް މިނިސްޓްރީއިން ވަނީ އެ ފަރާތްތަކަށް ބަހުގެ ހިދުމަތް ހަމަޖައްސައިދީފައެވެ.
ސައުދީ އަރަބިއްޔާއިން ރާއްޖެއަށް ދޭ 1،000 ހައްޖު ކޯޓާ މިފަހަރު ސަރުކާރުން ދީފައި ވަނީ ހައްޖު ކޯޕަރޭޝަންއަށް އެކަނިއެވެ.
