ވޯކް ވިސާގެ ހިދުމަތް ހޯދާ މީހުންނަށް ލުއިފަސޭހަ ބަދަލުތަކެއް އިމިގްރޭޝަނުން ގެނެސްފިއެވެ.
މީގެ ކުރިން ވޯކް ވިސާ ޖެހުމަށްފަހު ޕާސްޕޯޓާއި ހަވާލުވުމަށް ނަންބަރު ދޫކުރަމުން ދިޔައީ އިމިގްރޭޝަނަށް ހާޒިރުވުމުންނެވެ. އަދި އެ ފަރާތެއްގެ ނަންބަރު ޖެހެންދެން މަޑު ކުރަން ޖެހުމުން ހިދުމަތް ހޯދާ މީހުންގެ ޝަކުވާތައް ލިބެމުންދާ ކަމަށް އިމިގްރޭޝަނުން ބުންޏެވެ.
ނަމަވެސް މިއަދު ގެނައި މި ބަދަލާއެކު "އޭންޓް ކިޔޫ" އެޕްލިކޭޝަން މެދުވެރިކޮށް ކޮންމެ ތަނެއްގައި ހުރެ ވެސް އޮންލައިންކޮށް ނަންބަރު ނެގޭނެ އިންތިޒާމުތައް އިމިގްރޭޝަނުން ވަނީ ހަމަޖައްސާދީފައެވެ. އެގޮތުން ކަނޑައެޅިފައިވާ ވަގުތުގައި އެންޓްކިޔު މެދުވެރިކޮށް ނަންބަރު ނަގާ، ކިޔުގެ ހިދުމަތް ދެމުންދާ ތަރުތީބުވެސް ވަގުތުން ބަލާލެވޭނެ ކަމަށް އިމިގްރޭޝަނުން ބުނެއެވެ.
ފަސް ޕާސްޕޯޓަށް ވުރެ މަދުން ނަގާނަމަ ނަންބަރު ނަގުމަށް ކަނޑެއެޅުފައިވާ ގަޑިއަކީ 09:00 އިން 10:30 އާއި ދެމެދުއެވެ. އެ ނަންބަރުތަކަށް ހިދުމަތް ދިނުމަށް ހަމަޖެހިފައި ވަނީ ހެނދުނު 10:00 އިން 15:00 އާ ދެމެދުއެވެ. އަދި 6 ޕާސްޕޯޓަށްވުރެ ގިނަ ޕާސްޕޯޓާ ހަވާލުވާނަމަ ނަންބަރު ނެގުމަށް ކަނޑައެޅިފައިވާ ވަގުތަކީ 11:30 އިން 12:30 އާއި ދެމެދު ގައެވެ. އެ ނަންބަރުތަކަށް ޕާސްޕޯޓު ދޫކުރުމަށް ހަމަޖެހިފައިވަނީ 01:15 އިން 15:00 އަށެވެ.
ނަންބަރު ނެގުމަށް ސަބްމިޝަން ރިސިޓުގައި ހިމެނޭ ޕީޕީއެޗް ނަންބަރު އަދި ބޮކްސް ނަންބަރު ޖެހުމަށްފަހު، ސަބްމިޝަން ރިސެޓު އަޕްލޯޑު ކުރުމުން ނަންބަރު ނެގޭނެއެވެ. އަދި އެއް ޕީޕީއެޗް ނަންބަރު ނުވަތަ އެއް ބޮކްސް ނަންބަރަށްވުރެ ގިނަ އިންވެސް ޖެހޭނެ ކަމަށް އިމިގްރޭޝަނުން ވަނީ މައުލޫމާތު ދީފައެވެ.
އާންމުންނަށް ފަސޭހަ އަދި އަވަސް ހިދުމަތްތަކެއް ފޯރުކޮށްދިނުމަށް އިމިގްރޭޝަނުން ދަނީ ގިނަ މަސައްކަތްތަކެއް ކެނޑިނޭޅި ކުރަމުންނެވެ. އެގޮތުން މެޑިކަލް އެމަޖެެންސީގައި ޕާސްޕޯޓަށް އެދޭ ފަރާތްތަކުގެ އިތުރުން 65 އަހަރުން މަތީގެ ފަރާތްތަކަށް އިމިގްރޭޝަނަށް ހާޒިރުވެ ޕާސްޕޯޓަށް އެދި ހުށަހެޅޭނެ އިމްތިޒާމު ވަނީ ހަމަޖައްސާދީފައެވެ.
އަދި ހަމައެހެންމެ ރާއްޖޭގެ ހުރިހާ ސިޓީ ތަކަކުން ޕާސްޕޯޓް އަވަހަށް ލިބޭނެ އިންތިޒާމުތައް ވެސް އިމިގްރޭޝަނުން ހަމަޖައްސާފައެވެ. އެގޮތުން އިމިގްރޭޝަންގެ ރީޖަނަލް އޮފީސްތައް ހުންނަ ހދ. ކުޅުދުއްފުއްޓާއި ގދ. ތިނަދު އާއި ފުވައްމުލަކުގެ އިތުރުން އައްޑޫ އިން ޕާސްޕޯޓް ދޫކުރުން މިހާރު ދެގުނަ އަވަސްވާނެ ކަމަށް ބުނެއެވެ.
އަދި ވެރިފަރާތަށް ޕާސްޕޯޓް ދޫ ކުރާނަމަ އައިޑީކާޑާ ނުލާ ދޫ ކުރާ ގޮތަށް ހަމަޖެއްސުމުގެ އިތުރުން އިމިގްރޭޝަނުން ވަނީ ރާއްޖެއިން ބޭރަށް ދަތުރުކުރާ ދިވެހިންނަށް "ޓްރެވެލާ ޑެކްލެރޭޝަން" ފޯމު ނުވަތަ އިމުގަ ފޯމު ފުރަން ނުޖެހޭ ގޮތަށް ވެސް ހަމަޖައްސާފައެވެ.
