މިއަހަރުގެ މެއި 11 ގެ ނިޔަލަށް ޑެންގޫގެ 774 ކޭސް އަދި ޗިކުންގުންޔާގެ 389 ކޭސް ރިޕޯޓްކޮށްފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭގެ ތަފާސް ހިސާބުތަކުން ދައްކާ ގޮތުގައި މެއި މަހުގެ 5 ކުން 11 އަށްވެސް ވަނީ ޑެންގޫގެ 68 ކޭސް އަދި ޗިކުންގުންޔާގެ 104 ކޭސް ރިޕޯޓުކޮށްފައެވެ.
އެޗްޕީއޭއިން އާންމުކޮށްފައިވާ ތަފާސް ހިސާބުތަކުން ދައްކާ ގޮތުގައި ޗިކުންގުންޔާގެ ކޭސްތައް އިތުރުވާން ފަށާފައި ވަނީ މިދިޔަ މާޗު މަހުގެ 21 ވަނަ ދުވަހުން ފެށިގެންނެވެ. އަދި އެންމެ ގިނަ އަދަދަކަށް (244 ކޭސް) ޑެންގޫގެ ކޭސްތައް ރިޕޯޓްކޮށްފައި ވަނީ އޭޕްރީލް މަހުގައެވެ.
އަހަރުގެ މިހާތަނަށް ޑެންގޫގެ ކޭސްތަކުގެ އަދަދު:
- ޖެނުއަރީ - 137 ކޭސް
- ފެބްރުއަރީ - 116 ކޭސް
- މާޗު - 119 ކޭސް
- އޭޕްރީލް - 244 ކޭސް
- މެއި - 158 ކޭސް
އެޗްޕީއޭގެ ތަފާސް ހިސާބުތަކުން ދައްކާ ގޮތުގައި ޑެންގޫގެ ގިނަ ކޭސްތައް ރިޕޯޓްކޮށްފައި ވަނީ ހުޅުމާލެ ސަރަހައްދުންނެވެ. އެގޮތުން ބަލާއިރު ހުޅުމާލެ ސަރަހައްދުން ވަނީ ޑެންގޫގެ 192 ކޭސް ރިޕޯޓްކޮށްފައެވެ. އަދި މާލެއިން ޑެންގޫގެ 88 ކޭސް ރިޕޯޓުކޮށްފައިވާއިރު ދެން އެންމެ ގިނައިން ރިޕޯޓުކޮށްފައިވަނީ ކ. އަތޮޅުންނެވެ. އެއީ 66 ކޭހެވެ.
ޗިކުންގުންޔާގެ ކޭސްތަކަށް ބަލާއިރު އޭޕްރީލް މަހު 123 ކޭސް އަދި މެއި މަހު 265 ކޭސް ވަނީ ރިޕޯޓުކޮށްފައެވެ. ޗިކުންގުންޔާގެ ގިނަ ކޭސްތައް ރިޕޯޓްކޮށްފައި ވަނީ މާލެ ސަރަހައްދުންނެވެ. އެގޮތުން ބަލާއިރު މާލެ ސަރަހައްދުގައި ޗިކުންގުންޔާގެ 309 ކޭސް ރިޕޯޓްކޮށްފައިވާއިރު ހުޅުމާލެއިން ޗިކުން ގުންޔާގެ 66 ކޭސް ވަނީ ރިޕޯޓުކޮށްފައެވެ.
ޑެންގޫ އަދި ޗިކުންގުއްޔާއަކީ މަދިރީގެ ޒަރިއްޔާއިން ފެތުރޭ ބަލިތަކެއްކަމަށްވުމުން އެޗްޕީއޭއިން ވަނީ މަދިރި އާލާވުން މަދުކުރުމަށް ކަމާއި ގުޅުންހުރި ފަރާތްތަކާއި ގުޅިގެން މަސައްކަތްތަކެއް ފަށާފައެވެ. އެގޮތުން މަދިރި އުފެދޭ ތަންތަން ނައްތާލުމާއި ސާފުކުރުމުގެ މަސައްކަތްކުރަމުން ދާކަމަށް އެޗްޕީއޭ އިން ބުނެއެވެ.
