މި އަހަރުގެ މޭ މަހުގެ ކުރިން ލެބޯޓަރީގެ ހިދުމަތް ނުލިބޭ 72 ރަށެއްގައި ލެބޯޓަރީގެ ހިދުމަތް ގާއިމު ކުރަން ނިންމާ އެ މަޝްރޫ އިފްތިތާހު ކޮށްފިއެވެ.
މި މަޝްރޫ އިފްތިތާހުކޮށްދެއްވާފައިވަނީ މިއަދު މެންދުރުފަހު ދަރުމަވަންތަ ހޮސްޕިޓަލުގެ އުޑުވިލާ މާލަމުގައި ކުރިއަށްދިޔަ ރަސްމިއްޔާތުގައި ނައިބު ރައީސް ހުސައިން މުހައްމަދު ލަތީފެވެ. އެގޮތުން ސިއްހީ ހިދުމަތްތައް ރާއްޖޭގެ އެކި ކަންކޮޅުތަކުގައި ދިރިއުޅޭ ރައްޔިތުންނަށް މިހާރަށްވުރެ ރަނގަޅު ފެންވަރެއްގައި ފޯރުކޮށްދިނުމަކީ މި ސަރުކާރުން ވަރަށް ބޮޑު އަހުމިއްޔަތުކަމެއް ދެއްވައިގެން ކުރަމުން އަންނަ މަސައްކަތެއްކަން ނައިބު ރައީސް ވަނީ ފާހަގަކުރައްވާފައެވެ.
މީގެއިތުރުން މިހާތަނަށް ލެބޯޓްރީއެއްނެތް 4 ރަށެއްގައި މިއަދު އެ ހިދުމަތް ދޭން ފަށާނެކަމަށާއި އަދި މި އަހަރުގެ މޭ މަހުގެ ކުރިން، ލެބޯޓްރީ ނެތް ބާކީ 72 ރަށުގައިވެސް މި ހިދުމަތް ދޭން ފަށާނެކަަމަށް ނައިބު ރައީސް ވަނީ ވިިދާޅުވެފައެވެ.
ނައިބުރައީސް ވަނީ ރާއްޖޭގެ ސިއްހީ ނިޒާމު މިހާރަށް ވުރެ ކުރިއަރުވަން މަސައްކަތްކުރާ ކަމަށާއި ރައްޔިތުންނަށް ބޭނުންވާ ފެންވަރު ރަނގަޅު އިތުބާރު ހުރި ނިޒާމަކަށް ހެދުމަށް ކުރަން ޖެހޭ މަސައްކަތްތައް ކުރަމުން ދާކަމަށް ވިދާޅުވެފައެވެ.
އަދި ދިވެހިރާއްޖޭގައި މީހުން ދިރިއުޅޭ ކޮންމެ ރަށެއްގައި، ސިއްހީ ފަރުވާއަށް ބޭނުންވާ ލެބޯޓްރީގެ ހިދުމަތް ފުޅާކުރުމުގެ މަޝްރޫއެއް ފެށުމަކީ ރައީސްގެ ހަފުތާ 14 ގައި ހިމެނޭ ވައުދެކެވެ.
