މާލޭގެ އިންތިހާބީ މޭޔަރު އާދަމް އާޒިމާއި، ހުސްވެފައިވާ ދާއިރާތަކަށް އިންތިހާބުވި އާ ކައުންސިލަރުން ހުވާކުރެއްވުމުގެ ރަސްމިއްޔާތު އަންނަ ހޯމަ ދުވަހު ބޭއްވުމަށް ނިންމައިފިއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ސިޓީތަކާއި ލޯކަލް ކައުންސިލްތަކާ ބެހޭ މިނިސްޓަރު އާދަމް ޝަރީފް އުމަރު މިކަން އިއުލާނުކުރައްވައި ވިދާޅުވީ، މާލޭގެ އާ މޭޔަރާއި އާ ތިން ކައުންސިލަރުން ހުވާކުރުން އޮންނާނީ އަންނަ ހޯމަ ދުވަހު ދަރުބާރުގޭގައި ކަމަށާއި، އެ ރަސްމިއްޔާތުގައި ރައީސް ޑރ. މުހައްމަދު މުއިއްޒު ބައިވެރިވެވަޑައިގަންނަވާނެ ކަމަށެވެ.
ފާހަގަކުރެވޭ ގޮތުގައި މިހާރުގެ ރައީސަކީ މާލޭގެ ކުރީގެ މޭޔަރެވެ. މާލޭގެ މޭޔަރުގެ މަގާމު ހުސްވީ ރައީސްކަމަށް މުއިއްޒު އިންތިހާބުވެވަޑައިގަތުމުންނެވެ.
އާދަމް ޝަރީފް ވިދާޅުވީ، މާލެ އަށް ވެވަޑައިގެންނެވި ވައުދުތައް ރައީސް ފުއްދަވާނެ ކަމަށާއި، އާ ކައުންސިލަރުންނާއި މޭޔަރާ އެކު ގުޅިގެން މަސައްކަތްކުރެވޭނެ ކަމަށް އުންމީދުކުރައްވާ ކަމަށެވެ.
ނިމިދިޔަ ހަފުތާގެ ބަންދުގައި ބޭއްވި ބައި-އިލެކްޝަންގައި މާލޭގެ މޭޔަރުކަމަށް އާޒިމް އިންތިހާބުވެވަޑައިގަތީ ވޯޓުލީ 17،410 މީހުންގެ ތެރެއިން 7،621 ވޯޓު ހޯއްދަވައިގެންނެވެ. އާޒިމާ އެންމެ ގާތުން ވާދަކުރެއްވި ވެރިކަންކުރާ ޕީއެންސީގެ ކެންޑިޑޭޓު އައިޝަތު އާޒިމާ ޝަކޫރަށް ލިބިވަޑައިގަތީ 5،031 ވޯޓެވެ.
އިލެކްޝަންސް ކޮމިޝަނުން ވޯޓުފޮށިތައް ގުނައި އާންމުކުރި ރަސްމީ ނަތީޖާ އިން ދައްކާ ގޮތުގައި:
- ޝުއައިބު އަލީ (އަމިއްލަ): 125 ވޯޓު
- ހުސައިން ވަހީދު (އަމިއްލަ): 1،888 ވޯޓު
- އައިޝަތު އާޒިމާ ޝަކޫރު (ޕީއެންސީ): 5،031 ވޯޓު
- އާދަމް އާޒިމް (އެމްޑީޕީ): 7،621
- މުހައްމަދު ސައިފް ފާތިހު (ދަ ޑިމޮކްރެޓްސް): 2،343 ވޯޓު
އާ މޭޔަރު ހޮވުމުގެ އިތުރުން، މާލޭގެ ތިން ދާއިރާއެއްގެ ކައުންސިލަރުންގެ މަގާމު ހުސްވެފައިވާތީ އެ ދާއިރާތަކަށް އާ ކައުންސިލަރުން ވެސް އެ ދުވަހު އިންތިހާބުކޮށްފައިވެއެވެ. މިގޮތުން އެ ދުވަހު އިންތިހާބުކުރި އާ ކައުންސިލަރުންނަކީ:
- ހެންވޭރު ދެކުނު: އާމިނަތު ރިޝްފާ އަހްމަދު (ޕީއެންސީ)
- މެދުހެންވޭރު: އަހްމަދު ރިޝްވާން ރަޝީދު (އެމްޑީޕީ)
- މާފަންނު ދެކުނު: ހަސަން ނިޒާމް (ޕީއެންސީ)
