މިހާރު ކުރަމުންދާ ވިއްސާރާގައި މާލޭގެ ގެތަކަށް ލިބުނު ގެއްލުން ބައްލަވާލެއްވުމަށް ރައީސް ޑރ. މުހައްމަދު މުއިއްޒު ބައެއް ގެތަކަށް ޒިޔާރަތްކުރައްވައިފިއެވެ.
މިހާރު މުޅި ރާއްޖެއަށް ކުރަމުންގެންދާ ވިއްސާރާގައި ފެންބޮޑުވެ ގެ ތަކަށްވެސް ގެއްލުން ލިބިފައިވާއިރު ރޭ ހުއްޓާނުލާ ވާރޭ ވެހުމުގެ ސަބަބުން މުޅި މާލޭގައިވެސް ވަނީ ފެންބޮޑުވެފައެވެ. އަދި މާލޭގެ ބައެއް ގެތަކަށްވެސް ވަނީ އެކި ވަރުގެ ގެއްލުންތައް ލިބިފައެވެ.
ރައީސް މުއިއްޒާއެކު ނައިބު ރައީސް ހުސައިން މުހައްމަދު ލަތީފު ނޭޝަނަލް ޑިޒާސްޓާ މެނޭޓްމެންޓްގެ ޗީފް އެކްޒެކިއުޓިވް ހިސާން ހަސަންގެ އިތުރުން ދައުލަތުގެ ބައެއް ވަޒީރުންވެސް ވަނީ ގެތަކަށް ޒިޔާރަތްކުރައްވާފައެވެ. އޭގެ ތެރޭގައި ޑިފެންސް މިނިސްޓަރު ޣައްސާން މައުމޫނާއި ލޯކަލް ގަވަނަންސް މިނިސްޓަރު އާދަމް ޝަރީފް އުމަރު އަދި ހޯމްލޭންޑް މިނިސްޓަރު އަލީ އިހުސާންވެސް ހިމެނިވަޑައިަންނަވައެވެ.
އެ ޒިޔާރަތްކުރެއްވުމުގައި މުއިއްޒު ވަނީ އެ ގޭގެ މީހުންގެ ކަންބޮޑުވުންތައް އަޑުއައްސަވާ އެހީތެރިވެވަޑައިގަންނަނާނެ ކަމުގެ ޔަގީންކަން ވެސް ދެއްވާފައެވެ.
ފުލުހުން ވަނީ ގަދަ ވަޔާއެކު މިހާރު ރާއްޖެއަށް ކުރަމުންދާ ވިއްސާރަ އާ ގުޅިގެން މަގުތަކުގައި ފެންބޮޑުވެފައި ވާތީ، މަގުތަކުގައި ބާރު ސްޕީޑުގައި ވެހިކަލު ނުދުއްވުމަށާއި ޒަރޫރީ ދަތުރުތައް މެނުވީ މިވަގުތު ނުކުރެއްވުމަށް އިލްތިމާސްކޮށްފައެވެ.
ގަދަ ވަޔާއެކު ކުރަމުންދާ ވިއްސާރައާ ގުޅިގެން ބުރިޖު އަދި ހައިވޭގައި ފެންބޮޑުވެ، ވަޔާ ވެއްޔާއެކު ކުނި ހުރުމާއެކު ބުރިޖު އަދި ހައިވޭ ބޭނުންކުރައްވާ ފަރާތްތައް އެކަމުގައި ސަމާލުވުމަށްވެސް ފުލުހުން ވަނީ އެދިފައެވެ. އަދި ކޮންމެހެން ކުރައްވަންޖެހޭ ޒަރޫރީ ދަތުރުތަކަށް ހަތަރު ފުރޮޅުލީ އުޅަނދު ބޭނުންކުރުމަށްވެސް ފުލުހުން ވަނީ އިލްތިމާސްކޮށްފައެވެ.
މިހާރު ރާއްޖޭގެ އެކި ހިސާބުތަކަށް ކުރަމުން އަންނަ ވިއްސާރާގައި، ރަށްރަށުގައި ފެންބޮޑުވުމުގެ ހާދިސާތައް ކުރިމަތިވަމުން އަންނައިރު މޯލްޑިވްސް މީޓިއޮރޮލޮޖިކަލް ސާވިސް (މެޓް) އިން ވަނީ މިރޭ 9:30 ހަމައަށް ޅ. އަތޮޅުން ފެށިގެން ވ އަތޮޅަށް ޔެލޯ އެލާޓް ނެރެފައެވެ. އެ ސަރަހައްދުތަކަށް ޔެލޯ އެލާޓް ނެރެފައިވަނީ ބޯކޮށް ވާރޭވެހުމާއެކު ގުގުރުން އަދި ވިލާގަނޑުގައި ގަޑިއަކު 45 މޭލަށް ވައި ގަދަވާނެ ކަމަށް ލަފާކޮށެވެ.
މިރައީސްގެ ނަން ބޮޑުރަސްގެފާނަށް ބަދަލުކޮށް އުމުރުދުވަހު ވެރިކަމުގަ ހުރެވޭނެ ގޮތަކަށް ކަންކަން ރާވަން އެބަޖެހޭ ނޫންބާ!؟