މީގެ ދުވަސްކޮޅެއް ކުރިން އެމްޑީޕީން ވަކިވެވަޑައިގެންނެވި މަރަދޫ ދާއިރާގެ މެންބަރު އިބްރާހީމް ޝަރީފް ހިމެނިވަޑައިގަންނަވާ ހެން އެމްޑީޕީގެ 13 މެންބަރަކު ޕީއެންސީ އަށް ސޮއިކުރައްވައިފިއެވެ.
ޝަރީފް ހިމެނިވަޑައިގަންނަވާ ހެން ޕީއެންސީ އަށް ދެން ސޮއިކުރައްވާފައި ވަނީ:
- މުހައްމަދު ނިހާދު - ފޭދޫ ދާއިރާގެ މެންބަރު
- އަހްމަދު ހައިތަމް - މައްޗަންގޯޅި ދެކުނު ދާއިރާގެ މެންބަރު
- އަލީ ހަމީދު - އިސްދޫ ދާއިރާގެ މެންބަރު
- އަބްދުﷲ ޝަހީމް އަބްދުލްހަކީމް - ކަނޑިތީމު ދާއިރާގެ މެންބަރު
- އަބްދުލްޣަނީ އަބްދުލްހަކީމް - ކުރެންދޫ ދާއިރާގެ މެންބަރު
- ހަސަން ޒަރީރު - މަތިވެރި ދާއިރާގެ މެންބަރު
- އިބްރާހީމް ނަސީރު - މުލަކު ދާއިރާގެ މެންބަރު
- އަބްދުލްމުހުސިން ހަމީދު - ނިލަންދޫ ދާއިރާގެ މެންބަރު
- އާދަމް އަލީ - މާފަންނު ދެކުނު ދާއިރާގެ މެންބަރު
- މުހައްމަދު ރާޝިދު - ކޮމަންޑޫ ދާއިރާގެ މެންބަރު
- ހަސަން ޝިޔާން - ތޮއްޑޫ ދާއިރާގެ މެންބަރު
- އިބްރާހީމް ޝާޒު - ގުރައިދޫ ދާއިރާގެ މެންބަރު
މި 13 މެންބަރުންގެ ތެރެއިން ނިހާދާއި ޝިޔާނާއި ޝާޒު ފިޔަވައި ދެން ތިއްބެވި މެންބަރުން ޕީއެންސީ އަށް ސޮއިކުރެއްވި ފޯމާ ހަވާލުވެވަޑައިގަތީ ޕީއެންސީގެ ރައީސް، ރައީސް ޑރ. މުހައްމަދު މުއިއްޒެވެ.
ޕީއެންސީ އާ އަލަށް ގުޅިވަޑައިގެންނެވި މި 13 މެންބަރުން މީގެ ކުރިން 19 މަޖިލީހުގައި ތަމްސީލުކުރެއްވީ އެމްޑީޕީއެވެ. މި މެންބަރުންގެ ތެރެއިން ހައިތަމް އެމްޑީޕީން ވަކިވެވަޑައިގެންނެވީ ރިޔާސީ އިންތިހާބުގެ ދެވަނަ ބުރުގެ ވޯޓުލުން އޮތް ދުވަހުގެ މަދު ދުވަސްކޮޅެއް ކުރިންނެވެ. ޝަރީފު ވަކިވެވަޑައިގެންނެވީ މިދިޔަ އަންގާރަ ދުވަހުގައެވެ.
ބާކީ ތިއްބެވި މެންބަރުން އެމްޑީޕީން ވަކިވެވަޑައިގަތީ އޭގެ ފަހުންނެވެ.
އެހެންކަމުން މިރޭ ޕީއެންސީ އަށް ސޮއިކުރެއްވި މެންބަރުންނާ އެކު، 19 ވަނަ މަޖިލީހުގައި ދެން ޕްރޮގްރެސިވް ކޮންގްރެސް ކޯލިޝަން ތަމްސީލުކުރައްވާ 17 މެންބަރަކު ތިއްބަވާނެއެވެ. އެއީ ޕީޕީއެމްގައި ދެ މެންބަރުން، އަދި ޕީއެންސީގައި 15 މެންބަރުންނެވެ.
މިއާއެކު، މަޖިލީހުގެ އާ މައިނޯރިޓީ ޕާޓީ އަށް ސަރުކާރު ތަމްސީލުކުރާ ޕީއެންސީވެ، ފޮނަދޫ ދާއިރާގެ މެންބަރު މޫސާ ސިރާޖު މަޖިލީހުގެ އާ މައިނޯރިޓީ ލީޑަރަށް ވެގެން ދާނެއެވެ.
