ކޮންމެ ހުކުރު ދުވަހެއްގެ، ހުކުރު ހުތުބާގެ ތަރުޖަމާ އޮންލައިންކޮށް އެކި ބަސްބަހުން ލިބޭނެ ގޮތް ހަދުމާއެކު ހުތުބާ ލައިވް ކުރާގަޑީގައި އިނގިރޭސި ސަބްޓައިޓަލް ޓީވީއަށް އަރުވަން އިސްލާމިކް މިނިސްޓްރީން މިއަދު ނިންމައިފިއެވެ.

އިނގިރޭސި ބަހުން ހުތުބާ ގެނައުމާ މެދު ގިނަ ބައެއްގެ ފާޑުކިޔުންތަކެއް އަމާޒުވެފައި ވާއިރު ހުތުބާގެ ކަންކަމުގައި މަޝްވަރާ ކުރުމަށް މިއަދު އިސްލާމިކް މިނިސްޓްރީގެ ސީނިއާ މެނޭޖްމަންޓުގެ ބައްދަލުވުމެއް ވަނީ ބާއްވާފައެވެ.

މި ބައްދަލުވުމަށްފަހު އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ ރާއްޖޭގެ މިސްކިތްތަކުގައި ހުތުބާތައް ކުރިއަށް ގެންދާނީ ދިވެހި ބަހުންކަމަށެވެ.

މީގެ އިިތުރުން މިނިސްޓަރު ވިދާޅުވީ ހުތުބާގެ ތަރުޖަމާ އެހެން ބަސްބަހުން އޮންލައިންކޮށް ލިބޭނެ ގޮތް ހައްދަވާނެ ކަމަށާ އަދި ލައިވްކޮށް އިނގިރޭސިން ސަބްޓައިޓަލް އަރާ ގޮތައް ވެސް ހައްދަވާނެ ކަމަށެވެ. އަދި އިޝާރާތުގެ ބަހުން ވެސް ހުތުބާ ލައިވްކޮށް ގެނެސްދިނުމަށް މަސައްކަތް ކުރަމުން އަންނަކަމަށް މިނިސްޓަރު ޝަހީމް ވަނީ ވިދާޅުވެފައެވެ.

އިތުރަށް މިނިސްޓަރު ޝަހީމް ވިދާޅުވީ ރާއްޖެގައި އުޅޭ ބިދޭސީ މަސައްކަތްތެެރިން އިޖްތިމާއީ މަކާރިމުލްއަހުލާގަށް ހޭލުންތެރިކަން އިތުރު ކުރުމަށް އެގައުމުތަކުގެ އިދާރާތަކާ ގުޅިގެން ހޭލުންތެރިކުރުމުގެ ޕްރޮގްރާމްތައް ވެސް ފަށްޓަވާނެ ކަމަށެވެ. ހުތުބާއަކީ ކުރިއާލާ ޝެޑިއުލްކޮށް ތަރުޖަމާކުރާ އެއްޗެއްކަން ފާހަގަ ކުރައްވަމުން މިނިސްޓަރު ވިދާޅުވީ އެ ބައްދަލުވުމުގައި ނިންމި ނިންމުތަކަށް ޖެނުއަރީ 1، 2024 އިން ފެށިގެން އަމަލުކުރަން ފަށާނެކަމަށެވެ.

ހަބަރު ހުތުބާ އިސްލާމިކް މިނިސްޓްރީ މުހައްމަދު ޝަހީމް އަލީ ސައީދު