ކުރިއަށް އޮތީ ވަރަށް ވަރުގަދަ މަސައްކަތެއް ކަމަށް ވިދާޅުވެ ގައުމައިގެން ކުރިއަށް ދިއުމަށްޓަކައި ހުރިހާ ރައްޔިތުން ގުޅިގެން މަސައްކަތްކުރުމަށް، އިންތިހާބީ ރައީސް ޑރ. މުހައްމަދު މުއިއްޒު ރައްޔިތުންގެ ކިބައިން އެދިވަޑައިގެންފިއެވެ.
ޕްރޮގްރެސިވް ކޮންގްރެސް ކޯލިޝަންގެ ކެމްޕެއިން ޓީމްތަކާ މުއިއްޒު ބައްދަލުކުރެއްވުމަށް ބޭއްވި ޖަލްސާއެއްގައި ދެއްކެވި ކުރު ވާހަކަފުޅެއްގައި މުއިއްޒު ވަނީ، ކެމްޕެއިން ޓީމްތަކުން ކުރި މަސައްކަތް ފާހަގަކުރައްވައި ޝުކުރު އަދާކުރައްވައިފައެވެ.
މުއިއްޒު ސިފަކުރެއްވި ގޮތުގައި، ޕްރޮގްރެސިވް ކޮންގްރެސް ކޯލިޝަންގެ ކެމްޕެއިން ޓީމުތަކުން ކުރީ ވަރަށް ބޮޑު ގައުމީ މަސައްކަތެކެވެ. އެމަނިކުފާނު ވިދާޅުވީ، ގައުމު އުޖާލާކުރުމަށް ރަނގަޅު ފުރުސަތެއް ލިބިގެން މި ދިޔައީ ކެމްޕެއިން ޓީމުތަކުން ކުރި މަސައްކަތްތަކުގެ ސަބަބުން ކަމަށެވެ.
ނިމިދިޔަ ރިޔާސީ އިންތިހާބުގައި ލިބިވަޑައިގަތް ކާމިޔާބީ އަށް އިޝާރާތްކުރައްވައި މުއިއްޒު ވިދާޅުވީ ކަމެއް ހާސިލްކުރުމަކީ ފަސޭހަ ކަމެއް ކަމަށެވެ. ކުރިއަށް އޮތް ފަސް އަހަރަށް އިޝާރާތްކުރައްވައި އެމަނިކުފާނު ވިދާޅުވި ގޮތުގައި ދެން އޮތީ އެ މަސައްކަތް، ނުވަތަ ވެރިކަން ދެމެހެއްޓުމެވެ.
ކުރިއަށް އޮތީ އުޖާލާ މުސްތަގުބަލެއް ކަމަށް ވިދާޅުވެ، މުއިއްޒު އެދިވަޑައިގަތީ ގައުމައިގެން ކުރިއަށް ދިއުމުގައި ހުރިހާ ރައްޔިތުން ގުޅިގެން މަސައްކަތްކުރުމަށެވެ.
މި ހަފްލާގައި މުއިއްޒުގެ ކެމްޕެއިން ޓީމުގެ ފަރާތުން ވަނީ ކެމްޕެއިންގެ ހުލާސާ ރިޕޯޓެއް މުއިއްޒަށް އަރުވައިފައެވެ.
