ޕީޕީއެމް އާއި ޕީއެންސީގެ ގުޅިފައިވާ ސަރުކާރު ވާނީ އިސްލާމްދީނާ ދިވެހީންގެ ގައުމިއްޔަތަށް އެންމެ އިސްކަން ދޭނެ ވެރިކަމެއް ކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރާއްޖެ އިސްލާމްވީ ދުވަހާ ގުޅިގެން މުއިއްޒު ނެރުއްވި ބަޔާނުގައި ބުނެފައި ވަނީ އިސްލާމްދީން މަތީ ދިވެހިން ފައިތިލަ ސާބިތުކުރިތާ ހިޖުރީގޮތުން 9 ގަރުނު ފުރިހަމަވާން ބާކީ އޮތީ 3 އަހަރުކަމަށް ވާއިރު، މި ގައުމަށް އެންމެ ހެޔޮ ބަދަލެއް ގެނުވި ތާރީހީ ހާދިސާއަކީވެސް ރާއްޖެ އިސްލާމްވުން ކަމަށެވެ.
އަދި ވޭތުވެ މިދިޔަ ދިގު މާޒީގައި ސައްތައިން ސައްތަ މުސްލިމް ގައުމެއްގެ ގޮތުގައި ދިވެހިން ތިބެ މުޅި ދުނިޔެއަށް ދެއްކީ ނަމޫނާއެއް ކަމަށް ބަޔާނުގައި ވެއެވެ. އަދި މިއަދުގެ ދުނިޔޭގައި، ފިކުރީގޮތުންނާ، އިގްތިސާދީގޮތުންނާ، އަދި އިސްތިރާތީޖީ ގޮތުންވެސް ތަފާތު އެކި ގޮންޖެހުންތައް ހުރިކަން ފާހަގަ ކުރައްވާ މުއިއްޒު ވިދާޅުވީ އެއިން ކޮންމެ ގޮންޖެހުމަކާވެސް ދިވެހި ގައުމު އިސްކޮށް، ދިވެހިންގެ މަސްލަހަތު ކުރިއަށް ނެރެގެން ކުރިމަތިލުމަކީ ހުރިހާ ދިވެހިންވެސް އެދޭނެ ގޮތް ކަމަށެވެ.
މީގެ އިތުރުުންވެސް ރިވެތި އާދަކާދަތަކާ، މުއްސަނދި ސަގާފަތާ، އެއްބައިވަންތަކަމުގެ ހަގީގީ ނާރެހަކީވެސް މާތްވެގެންވާ އިސްލާމްދީން ކަމަށް އޭނާ ވިދާޅުވެފައި ވެއެވެ.
ހަމައެހެންމެ 17 ނޮވެމްބަރު 2023 ގައި ގާއިމުވާ ޕީޕީއެމް/ޕީއެންސީ އަދި ގުޅިފައިވާ ޕާޓީތައް ބައިވެރިވާ ސަރުކާރުވާނީ، އިސްލާމްދީނާ ދިވެހީންގެ ގައުމިއްޔަތަށް އެންމެ އިސްކަންދޭނެ ވެރިކަމެއް ކަމަށް ވެސް މުއިއްޒު ވަނީ ފާހަގަ ކުރައްވާފައެވެ. "ކުރިއަށް އޮތް ސަރުކާރު ވާނީ މި ގައުމުގެ އިސްތިގްލާލާ ފަހުރުވެރިކަން ނަގަހައްޓައިދޭ ސަރުކާރަކަށެވެ. ދިވެހީންގެ ރީތި އުޅުމާ ގުޅުމާ ގޮތްފޮތް ދަމަހައްޓައި، ދިވެހީންގެ ނަމާ އަބުރު ބައިނަލްއަގްވާމީ މަސްރަޙުގައި އުފުލައިދޭނެ ސަރުކާރަކަށެވެ." މުއިއްޒުގެ ބަޔާނުގައި ވެއެވެ.
ރާއްޖޭގެ ތާރީހީ ލިޔުންތަކުން އެނގޭ ގޮތުގައި ދިވެހިރާއްޖެއަށް އިސްލާމްދީނުގެ ހިދާޔަތު ލިބިގެން ދިޔައީ ހިޖުރައިން 548 ވަނަ އަހަރުގެ ރަބީއުލްއާހިރު މަހުގައެވެ. ރާއްޖެ އިސްލާމްވި ދުވަހުގެ ގޮތުގައި ދިވެހި ދައުލަތުން މިދުވަސް ފާހަގަކުރަން ފަށާފައި ވަނީ ހިޖުރައިން 1374 ވަނަ އަހަރެވެ. އެ އަހަރުން ފެށިގެން 1387 ގެ ނިޔަލަށް 14 އަހަރު މި ދުވަސް ފާހަގަ ކުރުމަށްފަހު އެ ދުވަސް ފާހަގަކުރުން ވަނީ ހުއްޓާލާފައެވެ. އޭގެ ފަހުން 1421 ވަނަ އަހަރުން ފެށިގެން މި ދުވަސް އަނެއްކާވެސް ދަނީ ފާހަގަކުރަމުންނެވެ. މިއަހަރަކީ ރާއްޖެ އިސްލާމްވިތާ ހިޖްރީ ގޮތުން 897 އަހަރު ފުރޭ ދުވަހެވެ.
