ނިމިދިޔަ ރިޔާސީ އިންތިހާބު ކާމިޔާބު ކުރައްވެވި އިންތިހާބީ ރައީސް ޑރ. މުހައްމަދު މުއިއްޒު، ފަތިސް ނަމާދުން ދުވަސް ފައްޓަވާ ނަމޫނާ ދައްކަވައިފިއެވެ.
ކެމްޕެއިން ދުވަސްވަރުގައި ވެސް މުއިއްޒު ނަމާދަށް ބެހެއްޓެވި ފަރުވާތެރިކަން، ގިނަ ބަޔަކު ވަނީ ފާހަގަ ކޮށްފައެވެ. އަދި ނަމާދު ވަގުތަކާއި ކެމްޕެއިން އިވެންޓެއް ދިމާވެއްޖެ ނަމަ އަވަހަށް އެކަމެއް މެދުކަނޑާލެއްމަށް ފަހު ނޫން ނަމަ އަވަހަށް ނިންމަވާލެއްމަށް ފަހު ނަމާދަށް އަވަސްވެ ގަތުމަކީ ގިނަ ބަޔަކަށް ވަރަށް ކަމުދިޔަ ސިފައެއް ވެސް މެއެވެ.
އެކަން ފާހަގަކޮށް ގިނަ ބަޔަކު ސޯޝަލް މީޑިއާގައި އެވާހަކަތައް ހިއްސާ ކޮށްފައި ވާއިރު މިއަދުވެސް މުއިއްޒުގެ ކިބައިން ފެނިގެން ދިޔައީ އެފަދަ މަންޒަރެކެވެ. 2000 އެއްހާ ވޯޓު ލިބުނު އެމްއެންޕީ ފިޔަވާ އިތުރު ބަޔަކާ ކޯލިޝަން ނުހަދާ ގިނިކަންޏާ ކަހަލަ ގޮތަކަށް ނިކުމެވަޑައިގެން ރިޔާސީ އިންތިހާބުގެ ދެ ބުރުވެސް ކާމިޔާބު ކުރެއްވި މުއިއްޒުގެ މިއީ ދިވެހިންނަށް ކަމުދާ އެއް ސިފައެވެ.
މިއީ މިފަދަ މަންޒަރެއް ފެނުނު ފުރަތަމަ ފަހަރެއް ނޫނެވެ. އިންތިހާބުގެ ފުރަތަމަ ބުރުގައި ލިބުނު ކާމިޔާބީއާ ގުޅިގެންވެސް މުއިއްޒު ވަނީ މިފަދައިން އަމަލު ކުރައްވާފައެވެ. އަދި ބައެއް ސޯޝަލް މީޑިއާ ޕޯސްޓްތައް ބުނާ ގޮތުން ނަމަ މިއީ އާ މަންޒަރެއް ނޫނެވެ. އަބަދުވެސް މުއިއްޒު މިސްކިތައް ވަޑައިން ޖަމާއަތުގައި ނަމާދު ކުރެއްވުމަކީ އޭނާގެ އާދައެކެވެ. އަދި މިއީ ރައްޔިތުން މުއިއްޒު އެންމެ ބޮޑަށް ބަލައިގަތް އެއް ސަބަބު ކަމަށްވެސް ވުމަކީ އެކަށީގެންވާ ކަމެކެވެ.
މުއިއްޒު ރިޔާސީ އިންތިހާބު ކާމިޔާބު ކުރައްވާފައި ވަނީ މިހާރުގެ ރައީސް އަދި އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހާ ވާދަކުރައްވާ ވޯޓުލީ މީހުންގެ 54 ޕަސެންޓާއެކު ކުރި ހޯއްދަވައިގެންނެވެ.
ވޯޓުލުމަށް ޖުމްލަ 586 ފޮށިބެހެއްޓި އިރު މިހާތަނަށް އެއް ވޯޓު ފޮށީގެ ނަތީޖާ ފިޔަވާ ހުރިހާ ވޯޓު ފޮއްޓެއްގެ ނަތީޖާ ވަނީ ގުނާ ނިމިފައެވެ. އެ ވޯޓު ފޮށިތަކުގެ ނަތީޖާއަށް ބަލާއިރު މުއިއްޒަށް 127،927 ވޯޓު ލިބިވަޑައިގެންފައި ވާއިރު ރައީސް ސޯލިހަށް ލިބިވަޑައިގެންފައި ވަނީ 109،261 ވޯޓެވެ.
