އަންނަ ހޮނިހިރު ދުވަހު ބާއްވަން ހަމަޖެހިފައިވާ ރިޔާސީ އިންތިހާބުގެ ދެ ވަނަ ބުރުގައި ވޯޓުލުމަށް އިންޑިއާގެ ޓްރިވެންޑްރަމްގައި އިތުރު ވޯޓު ފޮއްޓަކާ އެކު ޖުމްލަ 9 ވޯޓު ފޮށި ރާއްޖެއިން ބޭރުގައި ބަހައްޓަން އިލެކްޝަންސް ކޮމިޝަން (އީސީ) އިން ނިންމައިފިއެވެ.
ރިޔާސީ އިންތިހާބުގެ ފުރަތަމަ ބުރުގައި ރާއްޖެއިން ބޭރުގައި ބަހައްޓާފައި ވަނީ 8 ވޯޓު ފޮއްޓެވެ. ނަމަވެސް ދެވަނަ ބުރުގައި 9 ވޯޓު ފޮއްޓެއް ބަހައްޓަން ނިންމާފައިވާ ކަމަށް އީސީން ބުނެއެވެ. އެ ގޮތުން އިތުރު ފޮއްޓެއް ބަހައްޓަން ނިންމާފައި މިވަނީ އިންޑިއާގެ ޓްރިވެންޑްރަމްގައެވެ.
ރާއްޖެއިން ބޭރުގައި ބަހައްޓާ ވޯޓު ފޮށިތައް:
- ޔޫއޭއީ، އަބޫދާބީ - 1 ނަންބަރު ވޯޓު ފޮށި: 442 މީހުން ރަޖިސްޓްރީވެފައި
- އިންޑިއާ، ޓްރިވެންޑްރަމް - 1 ނަންބަރު ވޯޓު ފޮށި: 608 މީހުން ރަޖިސްޓްރީވެފައި
- އިންޑިއާ، ޓްރިވެންޑްރަމް - 2 ނަންބަރު ވޯޓު ފޮށި: 455 މީހުން ރަޖިސްޓްރީވެފައި
- ސްރީލަންކާ، ކޮލޮމްބޯ - 1 ނަންބަރު ވޯޓު ފޮށި: 670 މީހުން ރަޖިސްޓްރީވެފައި
- ސްރީލަންކާ، ކޮލޮމްބޯ - 2 ނަންބަރު ވޯޓު ފޮށި: 640 މީހުން ރަޖިސްޓްރީވެފައި
- މެލޭޝިއާ، ކުއަލަލަމްޕޫރު - 1 ނަންބަރު ވޯޓު ފޮށި: 915 މީހުން ރަޖިސްޓްރީވެފައި
- މެލޭޝިއާ، ކުއަލަލަމްޕޫރު - 2 ނަންބަރު ވޯޓު ފޮށި: 780 މީހުން ރަޖިސްޓްރީވެފައި
- މެލޭޝިއާ، ކުއަލަލަމްޕޫރު - 3 ނަންބަރު ވޯޓު ފޮށި: 825 މީހުން ރަޖިސްޓްރީވެފައި
- އިންގްލޭންޑް، ލަންޑަން - 1 ނަންބަރު ވޯޓު ފޮށި: 888 މީހުން ރަޖިސްޓްރީވެފައި
ރިޔާސީ އިންތިހާބުގެ ދެވަނަ ބުރަށް ރާއްޖެއިން ބޭރުގައި މިފަހަރު ބަހައްޓާ 9 ފޮއްޓަށް ޖުމްލަ 6223 މީހަކު މި ވަނީ ރަޖިސްޓްރީ ވެފައެވެ. އޭގެ ތެރެއިން އެންމެ ގިނަ މީހުން ރަޖިސްޓްރީ ވެފައި ވަނީ މެލޭޝިއާ، ކުއަލަލަމްޕޫރަށެވެ.
އިންތިހާބުގެ ފުރަތަމަ ބުރުގައި ބެހެއްޓި ވޯޓު ފޮއްޓަށް ބަލާއިރު، ދެވަނަ ބުރަށް ވޯޓު ލުމަށް އިތުރު 12 ފޮއްޓެއް ބަހައްޓާފައިވާ ކަމަށް އީސީން ބުނެއެވެ. އޭގެތެރޭގައި ރާއްޖެއިން ބޭރުގައި އިތުރު އެއް ފޮށި ބަހައްޓާފައިވާ އިރު، މާލޭގެ މީހުން ވޯޓު ލާން އިތުރު 3 ވޯޓު ފޮށި، ވިލިމާލޭގައި ދިރިއުޅޭ އެހެން ރަށްރަށުގެ މީހުން ވޯޓު ލާން އިތުރު ވޯޓު ފޮށްޓެއް ވަނީ ބަހައްޓާފައެވެ. އަދި ހުޅުމާލޭގައި ދިރިއުޅޭ އެހެން ރަށްރަށުގެ މީހުން ވޯޓު ލާން އިތުރު ހަތަރު ވޯޓު ފޮއްތަކާއި، މާލޭގައި ދިރިއުޅޭ ހއ އާއި ށ. އަދި ލ. އަތޮޅުގެ މީހުން ވޯޓު ލާން ކޮންމެ އަތޮޅަކަށް އިތުރު ވޯޓު ފޮށްޓެއް ވަނީ ބަހައްޓާފައެވެ.
ރިޔާސީ އިންތިހާބުގެ ފުރަތަމަ ބުރުގައި ވޯޓުލުމުގެ ހައްގު 282,394 މީހުންނަށް ލިބުނުއިރު ދެވަނަ ބުރުގައި އަލަށް ވޯޓުލެވޭ 409 މީހުންނާއެކު ޖުމްލަ 282,804 މީހުންނަށް ވޯޓުލުމުގެ ހައްގު ލިބިގެންވެއެވެ. ރިޔާސީ އިންތިހާބުގެ ފުރަތަމަ ބުރުގައި ގިނަ ބަޔަކު ވޯޓުލާފައި ނުވާއިރު އިންތިހާބުގެ ދެވަނަ ބުރުގައި ވޯޓުލުމަށް 50،047 މީހުން ވަނީ ރީ-ރަޖިސްޓްރީވުމަށް ފޯމު ހުށަހާފައެވެ.
