ދަރުބާރުގެ ޒަމާނީ ކޮންވެންޝަން ފެސިލިޓީއެއްގެ ގޮތުގައި ތަރައްގީކުރައްވާނެ ކަމަށް ޕީއެންސީގެ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެއެވެ.
މުއިއްޒު މިފަދައިން ވިދާޅުވީ ރޭ "ދަރުބާރު ޖަގަހަ" ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
މުއިއްޒު ވިދާޅުވީ، މީގެ އެތައް އަހަރެއް ކުރިން މާލޭގައި ޖަލްސާތަކާއި ހަފުލާތަކަށް ބޭނުންކުރާ ދަރުބާރުގެ އޭނާގެ ވެރިކަމެއްގައި ކުދި ވިޔަފާރިތައް ކުރުމުގެ ފުރުސަތު ދާއިމީކޮށް ލިބޭ ގޮތަށް ތަރައްގީ ކުރައްވާނެ ކަމަށެވެ.
މިގޮތުން ދަރުބާރުގެ ޒަމާނީ ކޮންވެންޝަން ފެސިލިޓީއެއް ގޮތުގައި ތަރައްގީކުރަން ޕްލޭންކުރައްވާ ކަމަށް މުއިއްޒު ވިދާޅުވިއެވެ. މުއިއްޒު ވިދާޅުވީ، ޒުވާނުންނާއި އަމިއްލަ މަސައްކަތުން ވިޔަފާރި ކުރަން ބޭނުންވާ ފަރާތްތަކަށް އެކަން ކުރުމުގެ ފުރުސަތު ލިބިގެންދާނެ ކަމަށެވެ.
ދަރުބާރުގެ ކޮންވެންޝަން ސެންޓަރުގައި ކުޑަ އަގެއްގައި ނުވަތަ އަތްފޯރާވަރުގެ އަގަކަށް ސްޓޯލެއް ކުއްޔަށް ނަގައިގެން ވިޔަފާރި ކުރުމުގެ ފުރުސަތު ސަރުކާރުން ފަހިކޮށްދޭން ބޭނުންވާ ކަމަށާއި އެއީ މިހާރު ވަރަށް މުހިންމު ކަމެއް ކަމަށް މުއިއްޒު ވިދާޅުވިއެވެ.
މީގެ އިތުރުން ރާއްޖެ އިން ބޭރުން ވެސް ކޮފަރެންސްތަކާއި ސެމިނާތައް މަތީ ފެންވަރުގައި ބާއްވާ ތަނަކަށް ދަރުބާރުގެ ހަދަން ބޭނުންވެވަޑައިގަންނަވާ ކަން ވެސް މުއިއްޒު ފާހަގަކުރެއްވިއެވެ.
