އިންޑިއާގެ އަންހެނުނަށް އެގައުމުގެ ގާނޫނު ހަދާ މަޖިލީހުގެ 33 ޕަސެންޓް ހާއްސަ ކުރުމަށް ވަކާލާތު ކުރާތާ 6 އަހަރު ފަހުން، އެގޮތަށް އެކަން ހަމަޖެއްސުމަށް ފާސްކޮށްފިއެވެ.
ކޮންމެ ފަަހަރަކު ބިލު ހުށަހަޅާއިރު ހޫނު ބަހުސްތަކެއް ކޮށް، ބިލް ބޭރު ކޮށްލަނީ އެގައުމުގައި އަންހެނުންނާ މެދު ދެކޭ ގޮތުގެ ސަބަބުން ކަމަށް ވާއިރު، އަލުން ބިލް ހުށަހެޅި 6 ވަނަ ފަހަރު ފާސްވެފައި ވަނީ ބޮޑު އަޣުލަބިއްޔަތަކުންނެވެ.
ގާނޫނު ހަދާ މަޖިލީހުގެ ތިރި ގެ 'ލޮކް ސަބާ' ގައި ތިބި މެންބަރުންގެ ތެރެއިން 454 މެންބަރުންގެ ތާއީދާއެކު ބިލް ފާސްވި އިރު ދެކޮޅަށް ވޯޓު ދިނީ 2 މެންބަރެކެވެ.
އެ ބިލުގެ ކިޔުން މިއަދު މަތި ގެ 'ރަޖްޔާ ސަބާ' ގައި ކުރިއަށް ދާއިރު ގިނަ މެންބަރުންގެ ރޫހު ހުރީ ބިލު ވަގުތުން ފާސްކޮށް ތަސްދީގު ކުރަން ގޮވާލާ ރޫހުގައެވެ.
ދަށު ގެއިން ފާސް ކުރާ ބިލު ގާނޫނަކަށް ހެދުމަށްޓަކައި މަތި ގެއިންވެސް ފާސްވާން ޖެހެއެވެ. މަތި ގޭގައި ބީޖޭޕީގެ މެޖޯރިޓީ އޮތް އިރު އެ ޕާޓީއާއި ކޯލިޝަނަށް ނިސްބަތްވާ 94 މެންބަރުން އެބަތިއްބެއެވެ. އިދިކޮޅު ކޮންގްރެސް އާއި ކޯލިޝަނަށް ލިބިފައި ވަނީ 30 ގޮނޑިއެވެ. ނަމަވެސް މެންބަރުންގެ ރޫހު ހުރިގޮތުން މި ބިލް މަތި ގެއިން ވެސް ފާސްވާނެ ކަމަށް ބެލެވޭ އިރު މިއީ އިންޑިއާގެ ތާރީހުގައި އަންހެނުންގެ ހައްގުތައް ރައްކާތެރިކުރުމަށް އެޅިގެންދާ މުހިންމު ފިޔަވަޅެއް ކަމަށް ދިރާސާ ކުރާ ފަރާތްތަކުން ބުނެއެވެ.
މި ބިލުގެ ބަހުސް ހިނގަމުން ދިޔަ އިރު ބައެއް މެންބަރުން ފާހަގަ ކުރި މުހިންމު ބައެއް މައްސަލަތަކުގެ ތެރޭގައި، މަޖިލީހުގެ 33 ޕަސެންޓް އަންހެނުންނަށް ހާއްސަ ކުރާ އިރު ކޯޓާ ބެހިގެން ދާނެ ގޮތް ހިމަނާފައި ނުވާކަން ފާހަގަ ކޮށްފައި ވެއެވެ. އެގޮތުން އިންޑިއާގެ އެކިއެކި ދަރިކޮޅުތަކަށް ލިބޭނެ ޕަސެންޓެއް ނުވަތަ ހައިސިއްޔަތެއް ނެތުމުގެ ކަންބޮޑުވުން އިދިކޮޅު ކޮންގްރެސް ގެ ލީޑަރު ރާހޫލް ގާނދީ ވަނީ ފާޅުކުރައްވާފައެވެ.
