މަޝްރޫއުތައް ހިންގަން ދައުލަތަށް އާމްދަނީ ލިބޭ ކަމަށާއި އެހެންނަމަވެސް "މިސްޔޫސް" ކުރާ ކަމަށް އިދިކޮޅު ޕީއެންސީގެ ރިޔާސީ ކެންޑިޑޭޓް، ޑރ. މުހައްމަދު މުއިއްޒު ވިދާޅުވެއްޖެއެވެ.
މި މަހުގެ 30 ވަނަ ދުވަހު ބާއްވާ ރިޔާސީ އިންތިހާބުގެ ދެވަނަ ބުރުގެ ކެމްޕެއިނަށް ނ އަތޮޅަށް ކުރެއްވި ދަތުރު ނިންމަވާލެއްވުމަށް ފަހު ރ އަތޮޅުގެ ފުރަތަމަ މަންޒިލެއްގެ ގޮތުގައި އެ އަތޮޅުގެ ވާދޫއަށް ވަޑައިގެން މުއިއްޒު ވިދާޅުވީ އެ ހުރިހާ ކަމެއް ކުރެވޭނެ ކަމަށާއި މި ސަރުކާރުގައި ދައުލަތަށް ލިބޭ އާމްދަނީ މިސްޔޫސް ކުރަނީ ކަމަށެވެ. އަދި ބޭކާރު ހަރަދުކުރާ ކަމަށާއި ވަރަށް ބޮޑަށް އިސްރާފް ކުރަމުންދާ ކަމަށް ވިދާޅުވެ ކޮރަޕްޝަނަށް މަގުފަހިވާ ގޮތަށް އެތައް ކަމެއް ކުރަމުންދާ ކަމަށް މުއިއްޒު ވަނީ ވިދާޅުވެފައެވެ.
މުއިއްޒު ވިދާޅުވީ ވާދޫގެ ރައްޔިތުންގެ ތަރައްގީގެ ވިސްނުން ވަރަށް ގާތުން ދަސްވެފައިވާ ކަމަށާއި މުއިއްޒު ހައުސިން މިނިސްޓްރީގައި ހުންނެވިއިރު ވާދޫގެ ކައުންސިލާ ބައްދަލުކޮށް ހެއްދެވި ކަމަށެވެ.
މުއިއްޒު ވިދާޅުވީ ވާދޫގެ ރައްޔިތުންގެ ވިސްނުން ހުންނަނީ އެހެން ލެވެލްއެއްގައި ކަމަށާއި ފެންވަރު ހުންނަނީ ވަރަށް މަތީގައި ކަމަށެވެ. އަދި އެކަމާ ވަރަށް އުފާކުރައްވާ ކަމަށް މުއިއްޒު ވަނީ ވިދާޅުވެފައެވެ. އަދި އެގޮތުގައި ކުރިއަށްދާ ބަޔަކަށް ހިތްވަރުދީ ފުރުސަތު ދިނުމަކީ ގަބޫލުކުރާ ކަމެއް ކަމަށް ވެސް މުއިއްޒު ވަނީ ވިދާޅުވެފައެވެ.
މުއިއްޒު ވިދާޅުވީ ރައްޔިތުން ބޭނުންވާ ކަންކަމަކީ ބޭކާރު ކަންކަމަކަށް ނުވާނެ ކަމަށެވެ. އަދި ވާދޫގައި ގޯތި ދޭން އޮޮތް ޖާގަ ގާތްގަނޑަކަށް ހުސްވެފައި ވާކަން ފާހަގަ ކުރައްވާ މުއިއްޒު ވިދާޅުވީ ދެން ހުރީ ސިނާއީ ކަންކަމަށް ހުރި ބިންތަކާއި ޓޫރިޒަމަށް ދޫކޮށްފައިވާ ބިންތައް ކަމަށެވެ. އަދި ރައްޔިތުން އެދޭ ގޮތަށް ބިން ހިއްކައިދެއްވާނެ ކަމަށް މުއިއްޒު ވިދާޅުވިއެވެ.
ރައީސް ޔާމީންގެ ވެރިކަމުގައި ރަށްރަށުގެ ބިން ހިއްކެވިކަން ފާހަގަ ކުރައްވާ މުއިއްޒު ވިދާޅުވީ އެކަމަށް ވަރަށް ފަރިތަ ވާނެ ކަމަށެވެ. އަދި ވާދޫގައި ކުރިއެރުމަށް ބަލާއިރު ބޮޑު ބަނދަރެއް ބޭނުންވާ ކަމަށާއި ރައްޔިތުން އެދިފައިވާ ގޮތަށް ބަނދަރު ހައްދަވައި ދެއްވާނެ ކަމަށާއި މައި މަގުތައް ރަނގަޅު ފެންވަރެއް ގައި ހައްދަވައި ދެއްވާނެ ކަމަށް މުއިއްޒު ވަނީ ވިދާޅުވެފައެވެ.
މުއިއްޒު ވިދާޅުވީ ހުރިހާ ރަށެއްގައި ވެސް ސިއްހީ ނިޒާމާއި ތައުލީމީ ނިޒާމު ވަނީ އަޅާނުލާ ދޫކޮށްލާފައި ކަމަށާއި ކޮންމެ ރަށަކުންވެސް އެ ވާހަކަދައްކާ ކަމަށެވެ.
ވާދޫގެ ވާހަކަ ނިންމަވާލައްވަމުން ވިދާޅުވީ، ސިއްހީ މަރުކަޒުގެ ނިޒާމާއި ހިދުމަތްތައް އިތުރު ކޮށްދެއްވާނެ ކަމަށެވެ.
