ލ. ގަމު ހޮސްޕިޓަލް ތަރައްގީކޮށް، ޓާޝަރީ ހޮސްޕިޓަލަކަށް ބަދަލުކުރައްވާނެ ކަމަށް ޕީއެންސީގެ ރިޔާސީ ކެންޑިޑޭޓް އަދި މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕެއިންނަށް ކުރައްވާ ދަތުރުގެ ތެރެއިން ލ. ފޮނަދޫއަށް ވަޑައިގެން މިހާރު އެ ރަށުގައި ކުރިއަށް ގެންދާ ކެމްޕެއިން ޖަލްސާގައި ވާހަކަ ދައްކަވަމުން މުއިއްޒު ވަނީ ގަމަށް ތަރައްގީގެ ގިނަ މަޝްރޫތައް އިއުލާން ކުރައްވާފައެވެ.
މިގޮތުން ގަމު ހޮސްޕިޓަލް ޓާޝަރީ ހޮސްޕިޓަލަށް ބަދަލުކުރައްވާނެ ކަމަށް މުއިއްޒު ވިދާޅުވިއެވެ. މީގެ އިތުރުން އައްސޭރި ޓޫރިޒަމް ފޮނުދޫ އަދި ގަން ވެސް ހިމެނޭ ގޮތަށް ފައްޓަވާނެ ކަމަށް މުއިއްޒު ވިދާޅުވިއެވެ. އަދި ގަމުގައި ހައުސިން ޔުނިޓްތަކެއް ކުރިއަށް ގެންދަވާނެ ކަމަށް ވެސް މުއިއްޒު ފާހަގަ ކުރެއްވިއެވެ.
މުއިއްޒު އިތުރަށް ވިދާޅުވީ، ކުރިއަށް އޮތް ފަސް އަހަރު ޒުވާނުންނަށް އިސްކަމެއް ދެއްވާނެ ކަމަށާއި މިގޮތުން ކުުޅިވަރު ކުޅެވޭ ގޮތަށް ސްޕޯޓްސް ކޮމްޕްލެކްސް އެއްވެސް އަޅުއްވާނެ ކަމަށެވެ.
މީގެ އިތުރުން ލ. މާމެންދޫ ބަނދަރު ހަދަންޖެހޭކަން ފާހަގަކުރައްވާ މުއިއްޒު ވިދާޅުވީ، އެރަށުގައި ބަނދަރު ހެދުމުގެ އިތުރުން ބިން އިތުރުކޮށްދެއްވާނެ ކަމަށެވެ.
މި ފަސް އަހަރު ނިމިގެން މިދަނީ ނާއުންމީދާއެކު ކަމަށާއި މުސަތަގުބަލު ބީވެ އަތުން ދާ މަންޒަރު ފެނިގެންދާ ކަމަށެވެ. އަދި މިހާރު މިއޮތީ މިނިވަންކަން ގެއްލިދާ ހިސާބުގައި ކަމަށް ވެސް މުއިއްޒު ފާހަގަ ކުރެއްވިއެވެ.
