ލ. ފޮނަދޫ ބިން ހިއްކާ، އިތުރު ހައުސިން ޔުނިޓު އަޅުއްވައި ދެއްވާނެ ކަމަށް ޕީއެންސީގެ ރިޔާސީ ކެންޑިޑޭޓް އަދި މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.
މުއިއްޒު މިހެން ވިދާޅުވީ، ރިޔާސީ ކެމްޕެއިންނަށް ކުރައްވާ ދަތުރުގެ ތެރެއިން ލ. ފޮނަދުއަށް ވަޑައިގެން މިހާރު އެ ރަށުގައި ކުރިއަށް ގެންދާ ކެމްޕެއިން ޖަލްސާގައި ވާހަކަ ދައްކަވަމުންނެވެ. މުއިއްޒު ވިދާޅުވީ، ފޮނަދުއަކީ ބިން އިތުރުކުރަންޖެހޭ ރަށެއް ކަމަށާއި އެގޮތުން ފޮނަދޫގެ ބިން ހިއްކުމުގެ މަޝްރޫޢެއް ކުރިއަށް ގެންގޮސްދެއްވާނެ ކަމަށެވެ.
މިކަމުގެ ސަބަބުން އެ ރަށަށް ބޭނުންވާ ވަރަށް ގެދޮރުވެރިކަމުގެ މަޝްރޫއެއް ކުރިއަށް ގެންދެވޭނެ ކަމަށް މުއިއްޒު ވިދާޅުވިއެވެ. މުއިއްޒު ވަނީ ފޮނަދޫ ބަނދަރު ބޮޑުކުރަން ޖެހޭ ކަން ފާހަގަކުރައްވާ އޭގެ ސަބަބުން އިގްތިސާދީ ގޮތުން އެތައް ފައިދާއެއް ކުރާނެ ކަމަށް ވެސް ވިދާޅުވެފައެވެ.
މީގެ އިތުރުން ކައްދޫ އެއާޕޯޓު އިންޓަނޭޝަނަލް އެއާޕޯޓަކަށް ބަދަލުކުރައަވާނެ ކަމަށާއި އޭގެ ސަބަބުން ދައިރެކްޓުކޮށް ފަތުރުވެރިންނަށް އާދެވޭނެ ކަމަށް ވެސް މުއިއްޒު ވިދާޅުވިއެވެ.
މީގެ އިތުރުން ފޮނަދޫގައި ޔުނިވާސިޓީ ކެމްޕަސްއެއް އަދި ޒުވާނުންނަށް ސްޕޯޓްސް ކޮމްޕްލެކްސް އެއް ގާއިމު ކުރައްވާނެ ކަމަށް ވެސް މުއިއްޒު ވިދާޅުވިއެވެ.
ބޯކޮށް ވާރޭވެހުމުގެ ސަބަބުން މިރޭގެ ޖަލްސާ ބާއްވާފައި ވަނީ މުއިއްޒުއާއެކު ރައްޔިތުން ވެސް ސްޓޭޖު މަތީގައި ތިބެގެންނެވެ،
އަންނަ މަހު އޮންނަ ރިޔާސީ އިންތިހާބަށް ކެމްޕެއިން ކުރެއްވުމަށްޓަކައި މިއަދު ހަވީރު މުއިއްޒު ލ. އަތޮޅަށް ވަޑައިގެންފައި ވާއިރު ކައްދޫން ގިނަ އަދަދެއްގެ ރައްޔިތުން ވަނީ މުއިއްޒުގެ އިސްތިގްބާލަށް ނުކުމެފައެވެ. އަދި އޭނާއަށް ވަނީ ރަތް ދޫލައިގެ މަރުހަބާއެއް ކިޔާފައެވެ.
ލާމުން މުއިއްޒުއަށް މަރުހަބާ ކިިޔުމަށް ނިކުމެފައިވާ ރައްޔިތުންގެ ކިޔު އެއާޕޯޓުން ފަށާފައި ވާއިރު ފޮއްދޫ އަވަށާ ހަމައަށް ކިޔު ދަމާލައިފައި އޮތެވެ.
