ޕީއެންސީގެ ރިޔާސީ ކެންޑިޑޭޓު، މާލެ ސިޓީގެ މޭޔަރު ޑރ. މުހައްމަދު މުއިއްޒުއަށް ލާމުން ވެސް ހޫނު މަރުހަބާއެއް ކިޔައިފިއެވެ.
އަންނަ މަހު އޮންނަ ރިޔާސީ އިންތިހާބަށް ކެމްޕެއިން ކުރެއްވުމަށްޓަކައި މިއަދު ހަވީރު މުއިއްޒު ލ. އަތޮޅަށް ވަޑައިގެންފައި ވާއިރު ކައްދޫން ގިނަ އަދަދެއްގެ ރައްޔިތުން ވަނީ މުއިއްޒުގެ އިސްތިގްބާލަށް ނުކުމެފައެވެ. އަދި އޭނާއަށް ވަނީ ރަތް ދޫލައިގެ މަރުހަބާއެއް ކިޔާފައެވެ.
މިރޭ 8:30ގައި ފޮނަދޫގައި މުއިއްޒުގެ ޖަލްސާއެެއް ބޭއްވުމަށް ވެސް ވަނީ ހަމަޖެހިފައެވެ
ލާމުން މުއިއްޒުއަށް މަރުހަބާ ކިިޔުމަށް ނިކުމެފައިވާ ރައްޔިތުންގެ ކިޔު އެއާޕޯޓުން ފަށާފައި ވާއިރު ފޮއްދޫ އަވަށާ ހަމައަށް ކިޔު ދަމާލައިފައި ވެއެވެ.
“ދަ ޕްރެސް”އަށް މައުލޫމާތު ދެއްވަމުން އެރަށު ރައްޔިތެއް ބުނީ، މިއީ ރައީސް އިބްރާހިމް މުހައްމަދު ސޯލިހު ލާމަށް ވަޑައިގެންނެވިއިރު މަރުހަބާ ކިއި ވަރަށް ވުރެ މާ ގިނަ އަދަދެއްގެ ބައެއް ކަމަށެވެ.
ރައީސް ސޯލިހު ވަޑައިގެން ބޭއްވި ޖަލްސާގައި ވެސް ބައިވެރިވެފައި ވަނީ ގާތްގަނޑަކަށް 600 އެއްހާ މީހުން ކަމަށް އެރަށުން ބުނެފައި ވެއެވެ.
