'ދަ ޑިމޮކްރެޓްސް' ދޫކޮށް، ތޮއްޑޫ ދާއިރާގެ ރައްޔިތުންގެ މަޖިލީހުގެ މެންބަރު ހަސަން ޝިޔާން އެމްޑީޕީ އަށް އަލުން ސޮއިކުރައްވައިފިއެވެ.
އެމްޑީޕީގެ ރިޔާސީ ޕްރައިމަރީ އަށް ފަހު، ޕްރައިމަރީން ނާކާމިޔާބުވެވަޑައިގެންނެވި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ތާއީދުކުރައްވާ، އެމްޑީޕީގެ 12 މެންބަރަކު ވަނީ ޕާޓީ ދޫކުރައްވައި ސިޔާސީ ޕާޓީ އެއް އުފައްދަވާނެ ކަން އިއުލާނުކުރެއްވިއެވެ. އެ މެންބަރުން އެގޮތަށް ނިންމެވީ މެދުހެންވޭރު ދާއިރާގެ މެންބަރު އަލީ އާޒިމް އެމްޑީޕީން ވަކިކުރަން މިދިޔަ މޭ މަހުގެ ފަހުކޮޅު އެ ޕާޓީގެ ފިޔަވަޅު އަޅާ ކޮމިޓީން ނިންމުމުންނެވެ.
އެ މެންބަރުންގެ ތެރޭގައި ޝިޔާން ވެސް ހިމެނިވަޑައިގަންނަވައެވެ.
ޑިމޮކްރެޓްސް ދޫކުރައްވައި، ޝިޔާން އެމްޑީޕީ އާ އަލުން ގުޅިވަޑައިގެން ރައީސް އިބްރާހީމް މުހައްމަދު ސޯލިހާ މެމްބަޝިޕް ފޯމު ހަވާލުކުރީ އެކަމަށްޓަކައި މިރޭ ބޭއްވި ކުޑަ ރަސްމިއްޔާތެއްގައެވެ.
ޝިޔާން އެމްޑީޕީ އާ ގުޅިވަޑައިގަތީ ޑިމޮކްރެޓްސްގެ ހަރަކާތްތަކާ ދުރުގައި އުޅުއްވާތާ ދުވަސްތަކަކަށް ފަހުގައެވެ. އޭނާ ޑިމޮކްރެޓްސް ދޫކުރެއްވި ސަބަބެއް އަދި ނޭނގެއެވެ.
އޭނާގެ އިތުރުން، މީގެ 10 ދުވަސް ކުރިން ކުޅުދުއްފުށި އުތުރު ދާއިރާގެ މެންބަރު ޔާސިރު އަބްދުއްލަތީފާއި ކުޅުދުއްފުށީގެ މުޅި ކައުންސިލް އެއްކޮށް ހެން ވަނީ އެމްޑީޕީ އަށް އަލުން ސޮއިކުރައްވައިފައެވެ.
