އަންނަ މަހު 9 ވަނަ ދުވަހު ބާއްވާ ރިޔާސީ އިންތިހާބުގެ ކެމްޕެއިނަށް ޕީއެންސީގެ ކެންޑިޑޭޓް މާލެ ސިޓީ މޭޔަރު ޑރ. މުހައްމަދު މުއިއްޒު މާދަމާ ށ އަތޮޅަށާއި ނ އަތޮޅަށް ފުރާވަޑައިގަންނަވާނެ ކަމަށް މުއިއްޒުގެ ސްޕޯކްސްޕާސަން ޕީޕީއެމްގެ ސެކްރެޓަރީ ޖެނެރަލް މުހައްމަދު ތޮލާލް ވިދާޅުވެއްޖެއެވެ.
މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ތޮލާލް ވިދާޅުވީ، މިހާރު ޑރ. މުއިއްޒު އައްޑޫއަށް ކުރައްވާ ކެމްޕެއިން ދަތުރު ނިންމަވާލެއްވުމަށް ފަހު މިރޭ ދަންވަރުގެ ވަގުތެއްގައި މާލެ ވަޑައިގަންނަވާނެ ކަމަށެވެ. އެއަށް ފަހު ފަތިހުގެ ވަގުތެއްގައި ށ. އަދި ނ އަތޮޅަށް ފުރާވަޑައިގަތުމަށް ހަމަޖެހިފައިވާ ކަމަށެވެ.
މި ދަތުރުގައި އެ އަތޮޅުގެ ރަށްރަށަށް މުއިއްޒު ވަޑައިގަންނަވާނެ ކަމަށާއި ރައްޔިތުންނާ ބައްދަލުކުރައްވައި ރައްޔިތުންގެ ވާހަކަތައް އަޑުއައްސަވާނެ ކަމަށް ތޮލާލް ވިދާޅުވިއެވެ. އަދި ރަށްރަށަށް ކުރައްވާ ދަތުރުގައި މުއިއްޒަށް ވެރިކަން ލިބިވަޑައިގެންފި ނަމަ ކޮށްދެއްވާނެ ކަންކަން އިއުލާން ކުރައްވާނެ ކަމަށާއި މުއިއްޒުގެ މެނިފެސްޓޯގައި ހިމެނޭ ކަންކަން ވެސް ހާމަ ކުރައްވާނެ ކަމަށް ތޮލާލް ވިދާޅުވިއެވެ.
މުއިއްޒު މިރޭ ދަންވަރުގެ ވަގުތެއްގައި މާލެ ވަޑައިގަންނަވާ އިރު މުއިއްޒުގެ ރަނިންމޭޓް ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް ވަނީ މިރޭ އިރާކޮޅުގެ ވަގުތެއްގައި ލ. އަތޮޅަށް ވަޑައިގެންފައެވެ. ރަނިން މޭޓްގެ ކެމްޕެއިން ހަރަކާތްތައް ދެން ކުރިއަށް ދާނީ ލ. އަދި ތ. އަތޮޅުގައި ކަމަށް ތޮލާލް ވިދާޅުވިއެވެ.
ރިޔާސީ އިންތިހާބު ބާއްވާ ދުވަސް ކުޑަތަން ވެފައިވާ އިރު ރާއްޖޭގެ ހުރިހާ ރަށަކަށް މުއިއްޒަށް ވަޑައިނުގެންނެވޭނެ ކަމަށް ލަފާ ކުރެވޭތީ ޕީޕީއެމް ޕީއެންސީ ކޯލިޝަންގެ ލީޑާޝިޕްގައި ހިމެނިވަޑައިގަންނަވާ ބޭފުޅުން އެހެން ރަށްރަށަށް ވަޑައިގެން ރައްޔިތުންނާ ބައްދަލު ކުރައްވާ ރައްޔިތުންގެ ކަންބޮޑުވުންތައް އަޑުއައްސަވާނެ ކަމަށް ތޮލާލް ވިދާޅުވިއެވެ.
