މާލޭގައި ރާ ކައްކާ އޭގެ ވިޔަފާރިކުރަމުން ދިޔަ ކަމުގެ ތުހުމަތުގައި ތިން ބިދޭސީން ހައްޔަރު ކޮށްފިއެވެ.
ފުލުހުން ކުރިއަށް ގެންދިޔަ އޮޕަރޭޝަނެއްގައި ގިނަ އަދަދެއްގެ ރާފުޅި ތަކާއެކު ހައްޔަރު ކޮށްފައި ވަނީ އިންޑިއާގެ ތިން މީހުންނެވެ. މި މައްސަލައިގައި ހައްޔަރުކޮށްފައިވަނީ ހައްޔަރުކުރީ 48 އަހަރުގެ މީހަކާއި 26 އަހަރުގެ މީހަކާއި 22 އަހަރުގެ ފިރިހެނެކެވެ.
މި މީހުންގެ އަތުން 500 އެމްއެލްގެ 273 ފުޅި އާއި ފަސް ލިޓަރުގެ 4 ފުޅި އާއި ޖޭމްސަން ބްރޭންޑްގެ ތިން ފުޅި ރާ ވަނީ ހޯދާފައެވެ. މީގެ އިތުރުން ފުލުހުން އެ ތަން ފާސްކުރިއިރު ބަނގުރާ ކެއްކުމަށް އެއްޗެހި އަޅައި ތައްޔާރުކޮށްފައިވާ 36 ޓައްޕު ވަނީ ފެނިފައެވެ.
މި ތިން މީހުންގެ ބަންދާ މެދު ގޮތެއް ނިންމަން ކްރިމިނަލް ކޯޓަށް ހާޒިރުކުރުމުން ކޯޓުން ވަނީ ގައުމީ ސަލާމަތަށް ނުރައްކަލެއް އޮތް ކަމަށް ކަނޑައަޅައި މި މީހުންގެ ބަންދަށް 15 ދުވަސް ދީފައެވެ.
އެމީހުން ބަންދުކުރަން ނެރުނު އަމުރުގައިވަނީ، އެ މީހުން ދިރިއުޅޭ ގޭގެ ގްރައުންޑް ފްލޯގެ ކޮޓަރިއަކުންނާ އަދި އެ ގޯޅިގަނޑުގައި ހުންނަ އެޕާޓްމަންޓެއްގެ ކޮޓަރިއެއްގެ ތެރެއިން ބަނގުރާ ކަމަށް ޝައްކު ކުރެވޭ ދިޔާ އެއްޗެހި ފެނިފައިވާ ކަމަށެވެ. މީގެ އިތުރުން ފުލުހުންނާ ހަވާލާދީ އެ އަމުރުގައި ވަނީ ބަނގުރާ ކެއްކުމަށް ބޭނުންވާ ސެޓަޕެއް އެޕާޓްމެންޓްގެ ތެރޭގައި ހަދާފައިވާ ކަމަށެވެ.
