އިންޑިއާގެ ޗެންނާއީގައި ސްކޫލުން ނިމިގެން މަންމައާއި ބޭބެ އާއެކު ގެއަށް ދިޔަ 8 އަހަރުގެ އަންހެން ކުއްޖަކަށް ގެރިއެއް ހަމަލާދީ ޒަހަމް ކޮށްލައިފިއެވެ.
އެ ހާދިސާގެ ވީޑިއޯ އާންމުވެފައި ވާއިރު، ފެންނަނީ 3 މައިން ހިނގާފައި ދިޔައިރު އެމީހުންގެ ކުރިން ހިނގާފައި ދިޔަ 2 ގެރިއެއްގެ ތެރެއިން އެކަތި ކުއްލިއަކަށް ފަހަތަށް އެނބުނި އޭގެ ދަޅުން އަންހެން ކުއްޖާ ނަގާ އެއްލާލި ތަނެވެ. އެއާއެކު އަންހެން ކުއްޖާގެ ގަޔަށް ދަޅު ހަރަމުން 'މޮޔަ ގެރިއެއްހެން' އަންހެން ކުއްޖާގެ ގައިމަތީ މޮއްގަނޑުން ތަޅަމުން އަރަމުން، ދަޅު ހަރަމުން ދިޔައެވެ.
އޭރު އަންހެން ކުއްޖާގެ މަންމަ އާއި ފިރިހެން ކޮއްކޮ ބިރުން ދުރުގައި ރެކިގެން ހުންނަތަން ފެނެއެވެ. ކައިރީގައި އޮތް ދެވަނަ ގެރި، ހަމަލާ ދެމުން ދިޔަ ގެރިއަށް ހުރަސް އަޅާކަހަލަ ގޮތަކަށް ވެސް ފެނެއެވެ. ނަމަވެސް ހަމަލާ ދެމުން ދިޔަ ގެރި އެ ގެރި ކައިރިން ނެއްޓި އަނެއްކާވެސް އަންހެން ކުއްޖާއަށް ހަމަލާ ދެއެވެ.
އެވަގުތު ކައިރީގައި އުޅުނު ބައެއް މީހުން ގެރިތައް ފައްސާލަން އެއްޗެހި އުކާ ހަދާތަން ފެނެއެވެ. ނަމަވެސް ރުޅި އައިސްފައި އޮތް ގެރި ދިމާކުރަނީ އަންހެން ކުއްޖާއަށް ހަމަލާ ދޭށެވެ.
އެދެގެރި އަންހެން ކުއްޖާ ދޫކޮށް ދިޔައީ ދަނޑިބުރިއެއް ހިފައިގެން ހުރި މީހަކު އޭގެ ފަހަތުން ދިމާކޮށް ތަޅައިގަތުމުންނެވެ.
ހަބަރުތައް ބުނާގޮތުން އެ ހާދިސާގައި އަންހެން ކުއްޖާގެ ބޯ ފަޅައިގެން ގޮސް ގިނަ ޒަހަމްތައް ވަނީ ލިބިފައެވެ. މިހާރު ހޮސްޕިޓަލުގައި ފަރުވާ ދެމުން ދާ އިރު، ޗެންނާއީގެ އޮފިޝަލުން ބުނީ، ފަރުވާ ކުޑަކޮށް ގެރިބަކަރި ގެންގުޅޭ ފަރާތްތަކާ މެދު ދައުވާ ކުރާނެ ކަމަށާއި، އެ ހާދިސާގެ ތަހުގީގެއް މިހާރު ފަށާފައި ވާ ކަމަށެވެ.
ހަބަރުތައް ބުނާގޮތުން ގެރި ރުޅި އައީ، އެ 3 މައިންގެ ތެރެއިން އެކަކު ތުމުން ފުމުމުންނެވެ.
ހޮލީ ކައު، ސީރިއަސްލީ؟؟