ކުރިއަށް އޮތް ރިޔާސީ އިންތިހާބުގައި ރަޖިސްޓްރީ ވެފައިވާ ރަށް ނޫން އެހެން ރަށެއްގައި ވޯޓުލާނަމަ، އެ ރަށަކަށް ރީ-ރަޖިސްޓްރީ ކުރުމަށް ހުޅުވާލި މުއްދަތު މިރޭ 10:00އަށް އިތުރުކޮށްފައިވާ ކަމަށް އިލެކްޝަން ކޮމިޝަނުން ބުނެފިއެވެ.
އޮންލައިންކޮށް ރީ-ރަޖިސްޓާވުމަށް ހުޅުވާލި ފުުރުސަތު ހަމަވެ މިހާރު ރީ-ރަޖިސްޓާވުން ކުރިއަށްދަނީ ހަމައެކަނި ފޯމް ހުށަހަޅައިގެންނެވެ. އެގޮތުން އޮންލައިންކޮށް ރީ-ރެޖިސްޓާވުމަށް ހުޅުވާލި ފުރުސަތުގައި 22،882 ފޯމު އީސީއަށް ލިބިފައިވާ ކަމަށާއި އޭގެ ތެރެއިން 18،088 ފޯމު ބަލައިގެންފައިވީ ނަމަވެސް އެކި މައްސަލަތަކާ ހެދި 4794 ފޯމު ބާތިލް ކޮށްފައިވާ ކަމަށް އީސީން ވަނީ ބުނެފައެވެެ.
ރީ-ރެޖިސްޓްރޭޓްރޭޝަން މުއްދަތު މިރޭ 10:00އާ ހަމައަށް ހަމަވާއިރު ދެން ރީ-ރަޖިސްޓްރޭޝަނަށް ދެން އިތުރު މުއްދަތު ދެވެންނެތީ، އިންތިހާބުގެ މަސައްކަތްތަކުގެ އިންތިޒާމުތަކަށް، ބުރޫއަރާނެތީ ކަމަށް އިސީއިން ވަނީ ބުނެފައެވެ.
މިހާރު ރަޖިސްޓްރީ ކޮށްފައިވާ ތަނުގައި، ވޯޓުފޮށްޓެއް ނުބެހެއްޓޭ ހާލަތުގައި، އެފަދަ ފަރާތްތަކަށް ދެވަނަ ފުރުސަތެއް، ނުލިބޭނެ ކަމަށާއި އެގޮތަށް ދިމާވާނީ، ރާއްޖޭން ބޭރާއި ރިސޯޓްތަކަށް ރީ-ރަޖިސްޓްރީ ކުރާ މީހުންނަށް ކަމަށް އީސީން ބުނެއެވެ.
އިލެކްޝަންސް ކޮމިޝަނުން ވަނީ ވޯޓުލެވޭ މީހުންގެ ލިސްޓު އާންމުކޮށް، ޝަކުވާ ހުށަހެޅުމުގެ ފުރުސަތު މިދިޔަ މަހުގެ 11 އިން 22 އަށް ހުޅުވާލައިފައެވެ. އެ ފުރުސަތުގައި 551 ޝަކުވާ އިލެކްޝަންސް އަށް ލިބިފައިވާއިރު، އެންމެ ގިނައިން ހުށަހަޅާފައި ވަނީ މަރުވެފައިވާ މީހުން ލިސްޓުގައި ހިމެނިގެން 465 ޝަކުވާއެވެ.
އަންނަ ސެޕްޓެމްބަރު މަހުގެ ނުވަވަނަ ދުވަހު ބާއްވާ އިންތިހާބުގައި ވޯޓުލުމުގެ ހައްގު 282،672 މީހުންނަށް ލިބިގެންވާ ކަމަށް، އިލެކްޝަންސްގެ ތަފާސްހިސާބުތަކުން ދައްކައެވެ. ރިޔާސީ އިންތިހާބުގައި ރަށްރަށުގައްޔާއި ރާއްޖޭން ބޭރުގައި ޖުމްލަ 604 ވޯޓުފޮށި ބެހެއްޓުމަށް ވަނީ ނިންމާފައެވެ.
