ރިޔާސީ އިންތިހާބަށް ކުރިމަތިލާ ކެންޑިޑޭޓުންގެ ނަންތައް ތަރުތީބު ކުރުން މިމަހު 9 ވަނަ ދުވަހު ބާއްވަން އިލެކްޝަންސް ކޮމިޝަން (އީސީ) އިން ނިންމައިފިއެވެ.
އިލެކްޝަންސް ކޮމިޝަންގެ ނައިބް ރައީސް އިސްމާއިލް ހަބީބް ކުރެއްވި ޓްވީޓެއްގައި ވިދާޅުވީ، ޝަރުތު ފުރިހަމަވާ ކެންޑިޑޭޓުންގެ ނަންތައް ތަރުތީބު ކުރުމަށްޓަކައި ބާއްވާ ގުރުއަތުލުން މި މަހުގެ 9 ވަނަ ދުވަހުގެ ހަވީރު 04:30 އިން ފެށިގެން 05:30 އަށް އޮންނާނެ ކަމަށެވެ.
މި ގުރުއަތުލުން އޮންނާނީ، ދަރުބާރުގޭގެ ރަންނަބަނޑޭރި މާލަމުގައި ކަމަށް ހަބީބު ވިދާޅުވިއެވެ.
ހަބީބު އިތުރަށް ވިދާޅުވީ، މި ރަސްމިއްޔާތުގައި ކެންޑިޑޭޓަކަށް ބައިވެރި ނުވެވޭ ހާލަތުގައި މަންދޫބަކު ބައިވެރި ކުރެވިދާނެ ކަމަށެވެ. އަދި މިކަމާ ގުޅޭ ތަފްސީލް އީސީން ކެންޑިޑޭޓުންނަށް އަންގާނެ ކަމަށް ވެސް ހަބީބު ވިދާޅުވިއެވެ.
ކުރިއަށް އޮތް ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހާއި ޖުމްހޫރީ ޕާޓީގެ ލީޑަރު ގާސިމް އިބްރާހިމާއި މޯލްޑިވްސް ނެޝަނަލް ޕާޓީގެ މުހައްމަދު ނާޒިމް ކުރިމަތިލައްވައެވެ. އަދި އިދިކޮޅު ޕީޕީއެމްއިން ނެރެފައިވަނީ ކޮރަޕްޝަންގެ މައްސަލައެއްގައި 11 އަހަރުގެ ޖަލު ހުކުމެއް ތަންފީޒު ކުރައްވަމުންދާ ކުރީ ރައީސް އަބްދުﷲ ޔާމީންއެވެ.
މީގެ އިތުރުން ދަ ޑީމޮކްރެޓްސްގެ ފަރާތުން އިލްޔާސް ލަބީބްގެ އިތުރުން އަމިއްލަ ގޮތުން ކުރީގެ ހޯމް މިނިސްޓަރު އުމަރު ނަސީރު އަދި އެމްއާރުއެމްގެ ރައީސް އަހްމަދު ފާރިސް މައުމޫނާއި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު ކުރިމަތިލައްވައެވެ.
