ޕީއެންސީގެ ރިޔާސީ ޓިކެޓަށް ކުރިމަތިލެއްވީ ރައީސް އަބްދުﷲ ޔާމީންގެ އެދިވަޑައިގަތުމުން ކަމަށާއި އެއީ ރައީސް ޔާމީނަށްޓަކައި ކުރައްވާ ކަމެެއް ކަމަށް މާލޭ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެެ.
މުއިއްޒު ވިދާޅުވީ ކުރިމަތިލެއްވީ ރައީސް ޔާމީނަށް ރިޔާސީ އިންތިހާބުގައި ވާދަކުރެއްވުމުގެ ފުރުސަތު ނުދެއްވައިފިނަމަ މި ޕާޓީ ( ޕީޕީއެމް/ޕީއެންސީ) މަގުމަތިވެދިޔަ ނުދިނުމަށްޓަކައި ކަމަށެވެ. އަދި ސްޕްރީމް ކޯޓަށް ހުށަހަޅާފައިވާ ރައީސް ޔާމީންގެ ކެންޑިޑެސީ ބަލައި ނުގަތް މައްސަލަ އެމަނިކުފާނާ ދެކޮޅަށް ނިންމައިފިނަމަ ރައީސް ޔާމީން އެދިވަޑައިގެންފައިވާ ގޮތަށް ޕީއެންސީގެ ބެކަޕް ކެންޑިޑޭޓެއްގެ ގޮތުގައި ކުރިމަތިލައްވަނީ ކަމަށެވެ.
ޕީއެންސީގެ ރިޔާސީ ޓިކެޓަށް މުއިއްޒު އަދި މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ކުރިމަތިލައްވާފައި ވާއިރު ޕާޓީ ކައުންސިލުން ނަގާ ވޯޓު ކާމިޔާބު ކުރެއްވޭނެ ކަމަށް މުއިއްޒު ވަނީ ވިދާޅުވެފައެވެ. އޭނާއަކީ ހުރިހާ ކަމެއްގައި ވެސް ރައީސް ޔާމީންގެ ވިސްނުންފުޅާ އެއްގޮތަށް މަސައްކަތް ކުރައްވަމުން ގެންދަވާ ބޭފުޅެއް ކަމަށާއި އެކަން ޕާޓީގެ ހުރިހާ އެންމެން ވެސް ގަބޫލުކުރާނެ ކަމަށް މުއިއްޒު ވިދާޅުވިއެވެ.
މުއިއްޒު އިތުރަށް ވިދާޅުވީ ސަރުކާރުގެ ކެބިނެޓް މިނިސްޓަރަކަށް ހުންނެވި އިރުވެސް އަދި މިއަދު ވެސް މަސައްކަތް ކުރައްވަމުން ގެންދަވަނީ ރައީސް ޔާމީންގެ ފިކުރުގައި، ރައީސް ޔާމީންގެ ތަރައްގީގެ ފިކުރު ދެމެހެއްޓުމަށް ކަމަށެވެ. އަދި މުއިއްޒު ދައްކަވާ ވާހަކަތަކަކީ ހިތުގެ އަޑިން ގަބޫލުކުރައްވާ ދައްކަވާ ތެދު ވާހަކަތަކެއް ކަމަށާއި އަމަލީ ގޮތުން އެކަން ސާބިތު ކޮށްދެއްވާ ބޭފުޅެއް ކަމަށެެވެ.
ޕްރައިމަރީގައި ބައިވެރި ވެވަޑައިގަތުމަށް މުއިއްޒު ޕީއެންސީއަށް ސޮއި ކުރައްވާފައި ވާއިރު އަދި ވެސް އުންމީދަކީ ރިޔާސީ އިންތިހާބުގައި ކުރިމަތިލައްވަން ނުޖެހި ރައީސް މިނިވަންވެގެން ވަޑައިގަތުން ކަމަށް ވެސް މުއިއްޒު ވިދާޅުވިއެވެ. އެކަން ނުވެއްޖެ ހާލަތެއްގައި ރައީސްގެ ލަފާފުޅުގެ މަތިން ޕީއެންސީ އިން ކެންޑިޑޭޓަކު ކުރިމަތިލާނެ ކަމަށާއި ކުރިއަށް އޮތް ދެ ތިން ދުވަސް ތެރޭގައި ރައީސް މިނިވަން ވެވަޑައިގަންނަވާނެ ކަމަށް އުންމީދު ކުރައްވާ ކަމަށް މުއިއްޒު ވިދާޅުވިއެވެ.
ޕްރައިމަރީގައި ވާދަކުރައްވާ ބަލިވެވަޑައިގެންފިނަމަ ދެން ކުރިމަތިލާ ކެންޑިޑޭޓަކަށް ތާއީދު ކުރައްވާ ރައީސް ޔާމީން މިނިވަން ކުރުމަށްޓަކައި ކުރެވޭ މަސައްކަތުގައި ފުރިހަމަ އެއްބާރުލުން ދެއްވާނެ ކަމަށް ވެސް މުއިއްޒު ވިދާޅުވިއެވެ. އެގޮތުން ރައީސް ޔާމީންގެ ހައްގުގައި ރައީސް ޔާމީން މިނިވަންކުރުމަށްޓަކައި ޕީޕީއެމް އަދި ޕީއެންސީ އިން ކުރާ މަސައްކަތުގައި ފެށުނީއްސުރެ ސާބިތުވެ ހުންނެވި ގޮތައް ކުރިއަށް އޮތް ތަނުގައި ވެސް ހުންނަވާނެ ކަން މުއިއްޒު ވަނީ ފާހަގަ ކުރައްވާފައެވެ.
ވ. އާރަށް ކުއްޔަށް ދިން މައްސަލައިގައި ރިޝްވަތު ހިފުމާއި މަނީ ލޯންޑަރިންގެ ކުށް ސާބިތުވެ، 11 އަހަރަށް ޖަލަށް ލާފައިވާ ޔާމީނަށް ރިޔާސީ އިންތިހާބުގައި ވާދަކުރެއްވުމުގެ ފުރުސަތު ލިބުމަށް ވުރެ ގާތީ ނުލިބުމެވެ. އެމަނިކުފާނަށް އިންތިހާބުގައި ވާދަކުރެއްވޭނެ ކަން ނުވަތަ ނޫންކަން ކަށަވަރު ވާނީ ސުޕްރީމް ކޯޓުން މައްސަލަ ނިންމާ ގޮތަކުންނެވެ.
މި މައްސަލައިގެ އަޑުއެހުމެއް މާދާމާގެ މެންދުރުފަހު 2:30 އަށް މިހާރު ވަނީ ތާވަލު ކޮށްފައެވެ.
ރައީސް ޔާމީންގެ ކެންޑިޑެސީ އާ ގުޅޭގޮތުން، ރައީސް ޔާމީންގެ ފަރާތްޕުޅުން، ދިވެހިރާއްޖޭގެ ސުޕްރީމް ކޯޓަށް ހުށަހަޅާފައިވާ މައްސަލައިގައި އީސީ އިން ޖަވާބުދާރީވުމަށް، ސުޕްރީމް ކޯޓުން އިއްޔެ ވަނީ އީސީ އަށް އަންގާފައެވެ. އީސީން ވަނީ މި މައްސަލާގައި ސުޕްރީމް ކޯޓަށް މިއަދު މެންދުރުފަހު 3 ގެ ކުރިން ޖަވާބު، ފޯމު މެދުވެރިކޮށް ހުށަހަޅާނެ ކަމަށް ބުނެފައެވެ.
