މިދިޔަ ޖޫން މަހު މާފަންނު ޕޮލިސް ސްޓޭޝަން އަދި ގަލޮޅު ޕޮލިސް ސްޓޭޝަނަށް ހުށަހަޅާފައިވާ އެކި މައްސަލަތަކުގައި ހިމެނޭ 3.5 މިލިއަނަށްވުރެ ގިނަ ރުފިޔާގެ އަގުހުރި ތަކެތި ހޯދައި އޭގެ ވެރިފަރާތްތަކާ ހަވާލުކޮށްފައިވާ ކަމަށް ފުލުހުން ބުނެފިއެވެ.
ފުލުހުން ބުނީ މާފަންނު ޕޮލިސް ރެސްޕޯންސް އެންޑް ޕެޓްރޯލް އިން 926،160 ރުފިޔާގެ އަގުހުރި ތަކެތި ހޯދާފައިވާ ކަމަށެވެ. އޭގެތެރޭގައި 720،000 ރުފިޔާގެ އަގުކުރެވިފައިވާ މޮޓޯ ސައިކަލެއްގެ އިތުރުުން 163،429 ރުފިޔާގެ އިލެކްޓްރޯނިކް ސާމާން ހިމެނެއެވެ.އަދި ނަގުދު ފައިސާއިން 20،651 ރުފިޔާ އަދި އެހެނިހެން ތަކެތީގެ ގޮތުގައި 22،080 ރުފިޔާގެ ތަކެތި ހޯދާފައިވާ ކަމަށް ފުލުހުން ވަނީ ބުނެފައެވެ.
މީގެއިތުރުން މާފަންނު ޕޮލިސް އިންވެސްޓިގޭޝަނުން 173،655.77 ރުފިޔާގެ އަގުހުރި ތަކެތި ހޯދާފައި ވާއިރު އޭގެ ތެރޭގައި 30،000 ރުފިޔާގެ މޮޓޯ ސައިކަލެއްގެ އިތުރުން އިލެކްޓްރޯނިކްސް ސާމާނާއި މޯބައިލް ފޯނު ގެއްލިގެން ހުށަހަޅާފައިވާ މައްސަލަތަކުގައި 20،300 ރުފިޔާގެ ތަކެތި ހޯދާފައިވެއެވެ. އަދި މަކަރާއި ހީލަތުގެ މައްސަލަތަކާ އެކްސިޑެންޓް ތަކުން ގެއްލުމުގެ ބަދަލުގެ ގޮތުގައި 103،893.77 ރުފިޔާ ހޯދައިދީފައި ވާއިރު އެހެނިހެން ތަކެތީގެ ގޮތުގައި 19،462 ރުފިޔާގެ ތަކެތި ހޯދާފައިވެއެވެ.
ފުލުހުން ބުނީ މި މުއްދަތުގެ ތެރޭގައި ގަލޮޅު ޕޮލިސް ރެސްޕޯންސް އެންޑް ޕެޓްރޯލް އިން 251،700 ރުފިޔާގެ އަގުހުރި ތަކެތި ހޯދާފައިވާ ކަމަށެވެ. އޭގެތެރޭގައި 225،000 ރުފިޔާގެ މޮޓޯ ސައިކަލާ 12،600 ރުފިޔާގެ އިލެކްޓްރޯނިކް ސާމާނުގެ އިތުރުން ނަގުދު ފައިސާއިން 1،500 ރުފިޔާ ހޯދާފައިވާ ކަމަށެވެ. އަދި އެހެނިހެން ތަކެތީގެ ގޮތުގައި 12،600 ރުފިޔާގެ މުދާ ވަނީ ހޯދާފައެވެ.
ގަލޮޅު ޕޮލިސް އިންވެސްޓިގޭޝަނުން 2،191،586 ރުފިޔާގެ އަގުހުރި ތަކެތި ހޯދާފައިވެއެެވެ. އޭގެތެރޭގައި ހިމެނެނީ 1،198،200 ރުފިޔާގެ އަގުހުރި ސައިކަލަކާ އިލެކްޓްރޯނިކްސް ސާމާނާއި މޯބައިލް ފޯނު ގެއްލިގެން ހުށަހަޅާފައިވާ މައްސަލަތަކުގައި ހޯދާފައިވާ 308،950 ރުފިޔާގެ ތަކެއްޗެވެ. މީގެ އިތުރުން މަކަރާހީލަތުގެ މައްސަލަތަކާ އެކްސިޑެންޓް ތަކުން ގެއްލުމުގެ ބަދަލުގެގޮތުގައި ހޯދައިދީފައިވާ 619،258.03 ރުފިޔާ އާއި އެހެނިހެން ތަކެތީގެ ގޮތުގައި ހޯދާފައިވާ 65،177.88 ރުފިޔާގެ ތަކެތި ހިމެނެއެވެ.
