މަސްތުވާތަކެތީގެ މައްސަލައެއްގައި ހައްޔަރު ކުރި މީހަކު 15 ދުވަހަށް ބަންދު ކުރުމަށް ކްރިމިނަލް ކޯޓުން ހުކުމް ކޮށްފިއެވެ.
މަސްތުވާތަކެތި ބޭނުންކޮށް، ގެންގުޅެ، އެތަކެތީގެ ވިޔަފާރި ކުރުމުގެ ކުށުގެ ތުހުމަތުގައި ހައްޔަރު ކޮށްފައި ވަނީ 30 އަހަރުގެ ފިރިހެނެކެވެ.
ކްރިމިނަލް ކޯޓުން ނެރުނު އޭނާގެ ބަންދުގެ އަމުރުގައި ވަނީ އޭނާ އުޅޭތަން ބަލާ ފާސްކުރުމުގެ ތެރެއިން ގިނަ އަދަދެއްގެ މަސްތުވާތަކެތި ކަމަށް ޝައްކު ކުރެވޭ އެއްޗެހި ފެނިފައިވާ ކަމަށެވެ.
އޭނާގެ ދިފާއީ ވަކީލުގެ ފަރާތުން ވަނީ އޭނާއަކީ ނަފްސާނީ މައްސަލަ ހުންނަ ނުކުޅެދޭ މީހެއްކަމަށް ބުނެފައެވެ. އަދި މަސްތުވާތަކެތީގެ މައްސަލައެއްގައި ހައްޔަރު ކުރި މީހަކު ނަފްސާނީ މައްސަލަތައް ހުންނަ ތޯ ބެލުމަށް އެސެސްމަންޓެއް ހަދަންޖެހޭކަމަށް އޭނާގެ ވަކީލުން ބުނެފައިވެއެވެ.
ކޯޓު އަމުރުގައި ބުނެފައި ވަނީ، ދައުވާ ލިބިގަތުމަށް ނުކުޅެދިގެންވާ ކަމުގެ ދިފާއު ސާބިތު ކުރުމަށް ހަދަންޖެހޭ އެސެސްމަންޓު ހެދުމަކީ ދިފާއުގެ ޒިންމާއެއް ކަމަށެވެ. އަދި އެކަމަށް ދޭން ޖެހޭ އެއްބާރުލުން ދިވެހި ފުލުހުންގެ ހިދުމަތުން ދޭނެކަމަށް އެ ބަޔާނުގައި ވަނީ ބުނެފައެވެ.
އޭނާގެ ބަންދުގެ މުއްދަތު ޖެހުމަށް ބޭއްވި އަޑުއެހުމުގައި ގާޒީ ވަނީ އޭނާއަކީ ދައުވާ ލިބިގަތުމަށް ނުކުޅެދޭ މީހެއްކަމުގައި ބުނާތީ ޖިނާއީ އިޖުރާއަތުގެ ޤާނޫނަށް ރިއާޔަތްކޮށް، އޭނާއަކީ ސިއްހީ ގޮތުން ދައުވާ ލިބިގަތުމަށް ނުކުޅެދިގެންވާ މީހެއްކަން ނުވަތަ ނޫންކަން އެނގޭނެ އެގްޒެމިނޭޝަނެއް ހެދުމަށް އަމުރު ކޮށްފައެވެ.
