މިހާރު އިއުލާން ކޮށްފައިވާ ހައުސިން ސްކީމްތަކަށް ބޭނުންވާ ބިން އެބަހުރި ކަމަށް ރައީސް އޮފީހުގެ ތަރުޖަމާން މިއުވާން މުހައްމަދު ވިދާޅުވެއްޖެއެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިއުވާން މިހެން ވިދާޅުވީ ހުޅުމާލެއިން އިތުރަށް ބިން ހިއްކުމުގެ މަޝްވަރާތަކެއް އާބަންކޯއިން ސަރުކާރާއެކު ކުރަމުންދާ ކަމަށް ބުނެފައިވާ ދަނޑިވަޅެއްގައެވެ.
މިއުވާން ވިދާޅުވީ މީގެ ކުރިން އިއުލާން ކޮށްފައި ވާ ފްލެޓާއި ގޯތި ދިނުމުގެ ޕްރޮގުރާމަށް ބޭނުންވާ ވަރަށް ހުޅުމާލެއާއި މާލެ ސަރަހައްދުގައި މިހާރުވެސް ބިން އެބަ ހުރި ކަމަށާއި ބިން ހިއްކަން މަޝްވަރާ ކުރަމުން ދަނީ އެ ޕްރޮގްރާމަށް ބޭނުންވާ ބިން ނެތިގެން ނޫން ކަމަށެވެ.
އާބަންކޯއާއި ސަރުކާރުން މަޝްވަރާ ކުރަމުން ދާތީ އެކަމާ ގުޅޭ ތަފްސީލީ މައުލޫމާތު ހާމަކުރެވެން ނެތް ކަން ފާހަގަ ކުރައްވާ ތަކުރާރުކޮށް މިއުވާން ވިދާޅުވީ ހައުސިން މަޝްރޫއުތަކާއި ގެދޮރުވެރިޔާ އަދި ބިންވެރިޔާ ސްކީމް އިއުލާން ކޮށްފައި ވަނީ އެކަމަށް ބޭނުންވާ ބިން ހުރިކަން ޔަގީން ކުރުމަށް ފަހު ކަމަށެވެ.
މިއުވާން ވިދާޅުވީ މާލެ ސަރަހައްދުގައި ވަރަށް ބޮޑަށް ތޮއްޖެހިފައި ވުމާއެކު ވަރަށް ބޮޑަށް ބޯހިޔާވަހިކަން ބޭނުންވެފައިވާ ކަމަށާއި މީގެ ކުރިން އެކުލަވާލާފައިވާ ޕްލޭންތަކަށް ކޮންމެވެސް ވަރެއްގެ ބަދަލުތަކެއް ގެންނަން ޖެހޭ ކަމަށްވާނަމަ އެ ބަދަލުތައް ގެނެސްގެންވެސް ރައްޔިތުންގެ ބޯހިޔާވަހިކަމުގެ މައްސަލަތައް ސަރުކާރުން ހައްލުކުރާނެ ކަމަށެވެ.
ހުޅުމާލެ އިތުރަށް ހިއްކުމުގެ މަޝްވަރާތައް ކުރި ނަމަވެސް، އެކަމުގައި ވަކި ގޮތެއް އަދި ނިންމާފައި ނުވާ ކަމަށް އާބަންކޯއިން ވަނީ ބުނެފައެވެ.
މައުލޫމާތު ލިބިފައިވާ ގޮތުގައި ހިއްކަން ހުށަހަޅަނީ ހުޅުމާލޭ ދެ ފޭސް ގުޅުވާލާ ބްރިޖްތައް ހިމެނޭ ޓަނަލްގެ ހުޅަނގު އުތުރުކޮޅަށް ނިމޭ ހިސާބުން، އުތުރަށް އޮތް މުޅި ފަޅެވެ. ގާތްގަނޑަކަށް 17 ހެކްޓަރުގެ އެ ސަރަހައްދު ހިއްކަން މަޝްވަރާ ކުރަމުންދާ ކަމަށް ވެސް މައުލޫމާތު ވަނީ ލިބިފައެވެ.
އެސަރަހައްދު ހިއްކާއިރު ކުރިން ރިސޯޓެއްގެ ގޮތުގައި އޮތް އަދި މިހާރު ހުޅުމާލޭގެ ދެވަނަ ފިޔަވަހީގެ ބައެެއްގެ ގޮތުގައި އޮތް ފަރުކޮޅުފުށި ވެސް އެކީއެކަށް ހިކިގެން ދާނެއެވެ.
ހުޅުމާލެ އިން ހިއްކަން މަޝްވަރާ ކުރާ ސަރަހައްދަކީ ބައިނަލްއަގުވާމީ ފެންވަރުގެ ކްރޫޒް ޓާމިނަލެއް ހަދަން ކުރީގެ ރައީސް އަބްދުﷲ ޔާމީންގެ ވެރިކަމުގައި އެކުލަވާލި މާސްޓާ ޕްލޭންގައި ހިމެނި ސަރަހައްދެކެވެ. އަދި އެ މަސައްކަތަށް އިންވެސްޓަރުން ޝައުގުވެރިކަން ފާޅުކުރި ކަމަށްވެސް މީގެ ކުރިން އާބަންކޯ އިން ވަނީ ބުނެފައެވެ.
ހުޅުމާލޭ ފުރަތަމަ ފިޔަވައްސާއި ދެވަނަ ފިޔަވަހީގައި ބޯހިޔާވަހިކަމުގެ ގިނަ މަޝްރޫއުތަކެއް މިހާރު ވެސް އަންނަނީ ހިންގަމުންނެވެ. އަދި ދެވަނަ ފިހަވަހިން މާލޭ ރައްޔިތުންނަށް ހިލޭ ގޯތި ދިނުމަށް މި ސަރުކާރުން ވަނީ ނިންމާ އިއުލާން ވެސް ކޮށްފައެވެ.
