އިންޑިއާގެ ޕަންޖާބުގެ ބަނދަރުމަތީގެ ރަށެއް ކަމަށް ވާ ލޫދިއާނާގައި ލީކުވި ތަނެއް ނޭނގޭ ތަނަކުން ގޭސް ލީކްވެ 12 މީހަކު މަރުވެ އެތައް ބަޔަކު ނޭވާ ކޮށިއަރައިގެން ފަރުވާ ދޭން ޖެހިއްޖެއެވެ.
ހަބަރުތައް ބުނާގޮތުން، މިހާދިސާގައި ހޮސްޕިޓަލުގައި އެޑްމިޓްކޮށްގެން 15 ވަރަކަށް މީހުންނަށް ފަރުވާ ދޭން ޖެހުނު އިރު 4 މީހެއްގެ ހާލަތު ތަންކޮޅެއް ގޯހެވެ.
މިހާދިސާ ހިނގުމާ އެކު، އޮފިޝަލުން އެ ސިޓީގެ ބަނދަރުމަތީ ސަރަހައްދު ބަންދުކޮށް އާންމުން ރައްކާތެރި ހިސާބުތަކަށް ގެންގޮސް މިހާރު ދަނީ ސާމްޕަލް ނަގާ ޓެސްޓް ކުރުމަށް ތައްޔާރު ވަމުންނެވެ.
އޮފިޝަލުން ލަފާ ކުރާ ގޮތުގައި ގޭސް ލީކްވި ނުވަތަ އެރި ކަމަށް ބެލެވެނީ، އެކި ސަރަހައްދުތަކުގައި ހުރި މާސިންގާ ޖަންކްޝަންތަކަށް ފައިބަން ހުންނަ އަނގައިން ނުވަތަ ޖާގައިންނެވެ. އެތަނުން ޖަންކްޝަންގައި އުފެދިފައި ހުރި މެތޭން ގޭސް އެރީ ކަަމަށް އޮފިޝަލުން ލަފާ ކުރެއެވެ.
މިހާދިސާ ހިނގާފައި ވަނީ، ހެނދުނު ގަޑީގައި ގިނަ ބަޔަކު ކިރު ގަންނަން އެ ސަރަހައްދުގައި ހުންނަ ކިރު ފިހާރައަށް ގޮސް ތިއްބައެވެ. އެ ފިހާރަ ކައިރީގައިވެސް މަތި ހަލާކުވެފައި ހުރި އެފަދަ ޖަންކްޝަންތައް ހުރެއެވެ.
އިންޑިއާގެ ނެޝަނަލް ޑިޒާސްޓާ ރެސްޕޯންސް ފޯސްއިން މިހާރު ހާއްސަ ހަރަކާތްތަކެއް އެ ސަރަހައްދުގައި ކުރިއަށް ގެންދާ ކަމަށް ވެސް ހަބަރުތައް ބުނެއެވެ.
އިންޑިއާގައި މަސައްކަތްތަކާ ގުޅޭ އެކި ދާއިރާތަކުގައި ގޭސް ލީކްވުމަކީ އާންމު ކަމެކެވެ. އެގޮތުން މީގެ 3 އަހަރު ކުރިން އަންދްރަ ޕްރަދޭޝްގެ ވިސާކަޕތްނަމް ގައި ވެސް ގޭސް ލީކްވެ 12 މީހަކު މަރުވި ހާދިސާގެ އިތުރުން 1984ގައި ބޯޕާލްގައި ހުރި ޕެސްޓިސައިޑް ޕްލާންޓަކުން ގޭސް ލީކްވެ އެތައް ހާސް ބަޔަކު މަރުވި ހާދިސާ ފާހަގަ ކޮށްލެވެއެވެ.
