ބަންގްލަދޭޝްގެ ނުވަ މީހަކު ހާޒިރުވުމަށް، އިމިގްރޭޝަނުން އިއުލާނުކޮށްފިއެވެ.
އިމިގްރޭޝަނުން އިއްޔެ ނޯޓިސް ނެރެ އަންގާފައި ވަނީ އުމުރުން 19 އަހަރާއި 45 އަހަރާ ދެމެދުގެ ނުވަ މީހަކު އެ އިދާރާގެ އޮފީހަށް ހާޒިރުވުމަށެވެ.
އެ އިދާރާ އިން ނެރެފައިވާ ނޯޓިސްގައިވާ ގޮތުން، ފަސް ދުވަހުގެ ތެރޭ އިމިގްރޭޝަންގެ ރިސްކް މެނޭޖްމަންޓް ސެކްޝަނަށް އެ ނުވަ މީހުން ހެނދުނު 9 އާއި މެންދުރުގަހު 1 އާ ދެމެދުގެ ވަގުތެއްގައި ހާޒިރުވާން ޖެހޭނެއެވެ.
އާންމު ގޮތެއްގައި އިމިގްރޭޝަންގެ ރިސްކް މެނޭޖްމަންޓް ސެކްޝަނަށް ބިދޭސީން ހާޒިރުކުރަނީ އިމިގްރޭޝަންގެ ގާނޫނާ ހިލާފުވެގެންނެވެ. މި ނުވަ މީހުން އިމިގްރޭޝަނަށް ހާޒިރުކުރާ ސަބަބު އެ އިދާރާ އިން ހާމަކޮށްފައެއް ނުވެއެވެ. މިކަމާ ގުޅިގެން އިމިގްރޭޝަނަށް ގުޅުމުން އެ އިދާރާ އިން ފޯނަށް ޖަވާބު ދީފައެއް ނުވެއެވެ.
މީގެ ކުރިން ވެސް އެކި މައްސަލަތަކުގައި ބިދޭސީން ހާޒިރުވުމަށް އަންގައި އިމިގްރޭޝަނުން ނޯޓިސް ނެރެފައިވެއެވެ.
