މިދިޔަ އަންގާރަ ދުވަހުން ފެށިގެން، ކ ތުލުސްދޫ، ޕަރިސްތާ / މުހައްމަދު މަހްދީ (35) ގެއްލިގެން ހޯދަމުން އައި ނަމަވެސް މިހާތަނަށް ފެނިފައި ނުވާ ކަމަށް އާއިލާ އިން މައުލޫމާތު ދެއެވެ.
ދިވެހިންގެ ތެރޭގައި ބޭސްފަރުވާއަށް މަޝްހޫރު އިންޑިއާގެ އަވަށެއްކަމުގައިވާ ކޮޗިންގައި ގެއްލިގެން ހޯދާތާ މިއަދަށް 3 ދުވަސް ވެފާއިރު އެންމެ ފަހުން އޭނާ ފެނިފައިވާ ކަމަށް ރިޕޯޓްކޮށްފައިވަނީ އިއްޔެ އިރުއޮއްސޭކަށްހާއިރު ޕޮނިކަރާ ސަރަހައްދުން ފެނިގެން ކަމަށް މަހުދީ ގެ ޅިޔަނު "ދަ ޕްރެސް" އަށް މައުލޫމާތު ހިއްސާ ކުރިއެވެ.
އެ ގޮތަށް މައުލޫމާތު ލިބުމާއެކު އިންޑިއާގެ ފުލުހުންގެ އެހީތެރިކަމާއެކު މިހާރު އެ ސަރަަހައްދު ބަލަމުންދާ ކަމަށާއި ނަމަވެސް މިހާތަނަށް އަދި ހަބަރެއް ވެފަ ނުވާ ކަމަށް ބުންޏެވެ.
ސިކުނޑީގައި އުނި ކަމެއް ހުރުމުގެ އިތުރުން ނަފްސާނީ ބަލީގެ ޝިކާރައަކަށް ވެފައިވާ މަހުދީ އަކީ ކުއްލި ރުޅި އަންނަމީހެއް ކަމަށާއި ރުޅި އަންނަ ފަހަރަކު ވަންޏާ ކޮންޓްރޯލް ކުރަން އެނދަގޫވުުމުގެ އިތުރުން ގިނަ ފަހަރު ކުރިމަތީގައި ތިބޭ މީހުންނަކީ ކޮންބަޔެއްކަން ނޭނގޭ ފަހަރުވެސް ދާ ކަމަށް ބުނިއެވެ.
އިތުރަށް މައުލޫމާތު ހިއްސާ ކުރަމުން ބުނީ، މަހުދީ އަތުގައި ފޯނެއް އޮތްކުމުގައިވީ ނަމަވެސް އެހެން ގައުމެއްގައި އޮތް ފޯނެއް ކަމުން ރާއްޖޭގެ ފުލުހުންގެ އިންޓަލިޖެންސްއަށް ޓްރޭސް ނުކުރެވޭނެކަމަށް ފުލުހުން އަންގާފައިވާކަމަށެވެ.
މަހުދީގެ ބައްޕައާއި ޅިޔަނެއްގެ އިތުރުން އޭނާގެ އެއްބަނޑު އެއްބަފާ ދައްތަ މި ދަތުރުގައި ބައިވެރިވެފައިވާ އިރު މި އެންމެންވެސް ދަނީ މަހުދީ ހޯދުމުގެ މަސައްކަތް ކުރަމުންނެވެ. މީގެ އިތުރުން މަހުދީގެ މަންމައާއި އާއިލާގެ އެހެން މެމްބަރުން ކޮޗިންއަށް ދިއުމަށްޓަކައި މިއަދު ފުރާފައިވެއެވެ.
މަހުދީގެ އެއްވެސް މައުލޫމާތެއް ލިބިއްޖެނަމަ 7889180 ނަންބަރު އަދި 7971667 ނަންބަރަށް މައުލޫމާތު ހިއްސާކުރުމަށްވެސް އާއިލާއިން ވަނީ އެދިފައެވެ.
